“Qamchiq” dovonida mashina xandaqqa tushib ketdi (video)

Kecha, 28 aprel kuni “Qamchiq” dovonida yana bir mashina xandaqqa quladi. Bu haqda Favqulodda vaziyatlar vazirligi xabar berdi.

Ma’lum qilinishicha, soat 15:40 atrofida A-373 “Toshkent–O‘sh” avtomobil yo‘lining “Qamchiq” dovonidan o‘tgan qismida harakatlanayotgan VAZ-2106 rusumli avtomobil boshqaruvni yo‘qotib, yo‘l chetidagi xandaqqa tushib ketgan. Bu haqda “Qamchiq” maxsus-qidiruv yong‘in-qutqaruv boshqarmasiga tezkor xabar kelib tushgan.

Voqea joyiga zudlik bilan yetib borgan qutqaruvchilar maxsus texnika va asbob-uskunalar yordamida mashinani xavfsiz tarzda chiqarib olgan. Hodisa oqibatida hech kim tan jarohati olmagan.

Eslatib o‘tamiz, kecha, 28 aprel kuni “Qamchiq” dovonida Isuzu yuk avtomobili boshqaruvni yo‘qotib, yo‘l o‘rtasidagi to‘siqqa borib urilishi oqibatida majaqlanib ketgan edi. FVV qutqaruvchilari tomonidan yuk mashinasining kabina qismida qisilib qolgan haydovchisi chiqarib olinib, birinchi yordam ko‘rsatilgan va Namangan viloyatining Pop tumanidagi tibbiyot birlashmasiga jo‘natilgan.