“Qamchiq”dagi xandaqqa Spark ag‘darilib ketdi

Kecha, 16 iyul kuni “Qamchiq” dovonidagi yo‘lning xandaq qismiga Spark avtomobili ag‘darilib ketdi. Bu haqda Favqulodda vaziyatlar vazirligi xabar berdi.

Ma’lum qilinishicha, soat 14:25 da A-373 “Toshkent-O‘sh” avtomobil yo‘lining “Qamchiq” dovonidan o‘tgan qismida “Toshkent-Vodiy” yo‘nalishida harakatlangan Spark rusumli avtomobil haydovchisi boshqaruvni yo‘qotishi oqibatida yo‘lning xandaq (kyuvet) qismiga tushib ketgan. Shundan so‘ng, haydovchi voqea haqida “Qamchiq” maxsus-qidiruv yong‘in-qutqaruv boshqarmasiga xabar bergan.

Xabarga asosan, bir guruh qutqaruvchilar aytilgan manzilga yetib borgach, maxsus texnika va asbob-anjomlar yordamida avtomobil xandaqdan olib chiqilgan.

Ma’lum bo‘lishicha avtomobilda haydovchi va 3 nafar yo‘lovchi bo‘lgan. Hodisa oqibatida tan jarohati olganlar bo‘lmagan.

Eslatib o‘tamiz, avvalroq “Qamchiq” dovonida HOVO rusumli yuk avtomashinasi xandaqqa tushib ketgandi.