Isroilning shifoxona yaqiniga bergan zarbasi oqibatida 5 jurnalist halok bo‘ldi

“Al-Quds Today” nashri jurnalistlari G‘azodagi Al-Avda shifoxonasida yuz berayotgan voqealarni yoritayotgan vaqtida ularning transport vositasi Isroil havo hujumiga uchradi. Bu haqda “Al-Jazeera” nashri xabar berdi.

Qayd etilishicha, hujum oqibatida jurnalistlar Fadi Hassouna, Ibrahim al-Sheikh Ali, Mohammad al-Ladah, Faisal Abu al-Qumsan va Ayman al-Jadi halok bo‘lgan. “Al-Jazeera” jurnalisti Anas al-Sharifning xabariga ko‘ra, voqea Ayman al-Jadi shifoxonada xotini birinchi farzandini dunyoga keltirayotgan vaqtida sodir bo‘lgan.

Ijtimoiy tarmoqlarda tarqalgan video tasvirlarida yonayotgan transport vositasi tasvirlangan. Oq rangli furgondan olingan ekranning surati orqasida “press” so‘zi katta qizil harflar bilan yozilgan.

Halok bo‘lgan jurnalistlarning jasadlarini fuqarolik mudofaa guruhlari olib chiqqan va voqea joyidagi yong‘inni o‘chirgan.

Isroilning harbiy kuchlari hujumni “maqsadli” deb atab, bu transport vositasida "terrorchilar" borligini aytgan.

Ma’lumot uchun, Jurnalistlarni himoya qilish qo‘mitasi (CPJ) shu oy boshida Isroilning bir hafta ichida to‘rt falastinlik jurnalistni o‘ldirishini qoralab, xalqaro hamjamiyatni yahudiy davlatini ommaviy axborot vositalariga qarshi olib borayotgan hujumlar uchun javobgarlikka tortishga chaqirgan edi. CPJ ma’lumotlariga ko‘ra, 2023 yil 7 oktyabrdan boshlab Isroilning G‘azoga bosqinida kamida 141 jurnalist halok bo‘lgan.

Eslatib o‘tamiz, avvalroq “Chegara bilmas muxbirlar” 2024 yilda 54 nafar jurnalist kasbiy faoliyati ortidan vafot etganini ma’lum qilgandi.