Isroilda favqulodda holat e’lon qilindi

Bugun, 25 avgust kuni Isroil Livan hududiga zarba berishni boshladi va u hali ham davom etmoqda. Bu haqda “Reuters” xabar berdi.

Isroil havo kuchlari Livandagi “Hizbulloh” marralariga zarba berish uchun 100 ga yaqin samolyotni joylashtirdi. Havo hujumlari paytida minglab raketa uchirgichlari yo‘q qilindi.

Ma’lumotlarga ko‘ra, ularning joylashuvi Shimoliy qo‘mondonlik va Isroil harbiy razvedkasi tomonidan aniqlangan. Isroil armiyasining ma’lum qilishicha, “Hizbulloh” rejalashtirilgan raketa otishmalarining aksariyati Isroilning shimoliy va ba’zi markaziy qismlariga zarba berish uchun joylashtirilgan. Jangovar samolyotlar 40 ta ishga tushirish nuqtasiga zarba bergan.

Isroil armiyasining radio xizmatiga ko‘ra, “Hizbulloh” Isroildagi strategik nishonlarga zarba berishni rejalashtirgan 6 mingtagacha raketa va uchuvchisiz havo vositalarini uchirishni maqsad qilgan. Hisobotga ko‘ra, armiya Livandagi 200 ga yaqin nuqtaga zarba bergan.

Livandan Isroil tomonga 150 dan ortiq dron va raketalar uchib kelgan. “Hizbulloh” esa Isroildagi 11 ta harbiy nishon tomon 320 ta raketa uchirganini e’lon qilgan.

Isroil armiyasi matbuot kotibi Daniel Hagarining iddao qilishicha, o‘z-o‘zini himoya qilish maqsadida ushbu tahdidlarni bartaraf etish uchun mudofaa kuchlari Livandagi “Hizbulloh“ harakati tinch aholiga qarshi hujumlar uyushtirmoqchi bo‘lgan “terrorchilik ob’ektlari”ga zarba bermoqda.

Harbiylar Livan bo‘ylab zarbalar berishni boshlagach, Isroil Mudofaa vaziri Yoav Galant mamlakatda 48 soat muddatga favqulodda holat rejimi e’lon qilgan. Tel-Aviv xalqaro aeroporti reyslarni qabul qilishni va jo‘natishni to‘xtatgan.

Keyinroq Hagari harbiy-havo kuchlarning o‘nlab samolyotlari Janubiy Livandagi qator lokatsiyalar bo‘ylab zarba berayotganini aytdi.

Eslatib o‘tamiz, avvalroq Isroil iyul oyining ikkinchi yarmida Livan janubida “Hizbulloh”ga qarshi quruqlikdagi operatsiyani boshlashi mumkinligi xabar qilingandi.