Isroil Ismoil Xoniyaning o‘limiga aloqadorligini tan oldi

Isroil Mudofaa vaziri Isroil Kats joriy yilning iyul oyida Tehronda HAMAS siyosiy byurosi rahbari Ismoil Xoniyaning o‘ldirilishi ortida Isroil rasmiylari turganini birinchi marta tan oldi. Bu haqda BBC xabar berdi.

Isroil Mudofaa vaziri Yaman xusiylari tomonidan Isroilni o‘qqa tutishi haqida fikr bildirdi:

“Biz (Ismoil) Xoniya, (Yahyo) Sinvar va (Hasan) Nasrullohga Tehron, G‘azo va Livanda qilganimizdek, Hodeyda va Sanoda ham shunday qilamiz“, dedi u bu yil o‘ldirilgan “Hizbulloh“ va HAMASning ikki yetakchisini nazarda tutib.

Ma’lumot uchun, 62 yoshli Xoniya 31 iyul kuni Eron Prezidenti Mas’ud Pezeshkiyonning inauguratsiyasiga borganida Tehrondagi qarorgohida o‘ldirilgan edi. Taxminlarga ko‘ra, u turgan uy havo hujumiga uchragan.

Uning o‘limidan so‘ng, HAMAS Yahyo Sinvarni o‘zining yangi rahbari etib sayladi. U oktyabr oyida G‘azo sektorida Isroil qo‘shinlari tomonidan o‘ldirilgan. Undan avval, “Hizbulloh“ yetakchisi Hasan Nasrulloh sentyabr oyida o‘ldirilgandi.

Yaman shimoli-g‘arbini nazorat qiluvchi husiychilar o‘tgan yil oktyabr oyida Isroil G‘azoda HAMASga qarshi amaliyot boshlaganidan ko‘p vaqt o‘tmay Qizil dengizda isroilliklarning va boshqa davlatlarning kemalariga hujumlar uyushtirishni, shuningdek, Isroil hududi bo‘ylab raketa va dronlar uchirishni boshlagandi.

Shu bilan birga, Yaman qurolli kuchlari bosib olingan Falastinning Ashdod yaqinida joylashgan Yavne shahrida Isroilning nozik nishoniga uchuvchisiz samolyot bilan hujum qilib, harbiy amaliyot o‘tkazganligi haqida ma’lumot berdi.

Joriy yilning noyabr oyida Isroil Yamandagi harbiy ob’ektlar bo‘ylab zarbalar yo‘llab, portni aniq nishonga olgani ma’lum bo‘ldi. AQSH va Buyuk Britaniya ham xalqaro kemachilikni muhofaza qilish bo‘yicha amaliyot doirasida husiychilarning nishonlariga hujum qilgan.

O‘tgan hafta 21 dekabr kuni Isroilning “Temir gumbaz” tizimi yamanlik husiylar tomonidan Tel-Avivga yo‘llangan ballistik raketani ushlab qola olmagani va snaryad shahar markazidagi bolalar maydonchasiga quladi.

Mohimbegim Ma’rufaliyeva