Ispaniya ham Kiyevga tank yuboryapti 

Ispaniya 9 aprel Pasxa bayramidan keyin Ukrainaga Germaniyada ishlab chiqarilgan 2A4 Leopard rusumli oltita tankni yuboradi. Bu haqda bugun, 29 mart kuni Ispaniya Mudofaa vaziri Margarita Robles parlamentdagi chiqishida ma’lum qildi. 

Roblesning aytishicha, mamlakat 1990 yillardan beri foydalanilmayotgan jangovar mashinalarni yaqinda ta’mirdan chiqargan va ularning jangovar tayyorgarligini sinovdan o‘tkazgan.

“Leopard’larni yuborish orqali biz Ukraina xalqiga o‘zini mutlaqo adolatsiz hujumdan himoya qilishda yordam berishda davom etamiz”, degan Margarita Robles.

Shuningdek, Ispaniya Mudofaa vaziri yaqin kelajakda yuboriladigan yana to‘rtta tank ta’mirlanishini qo‘shimcha qilgan. Bundan tashqari, Ispaniya harbiylari Ukrainaning shimoli-sharqidagi Saragosa shahrida bir necha hafta davomida tank ekipajlarini tayyorgarlikdan o‘tkazgani ochiqlangan.

Ma’lumot uchun, shu hafta boshida Germaniya tomonidan va’da qilingan 18 ta Leopard 2 va Portugaliya tomonidan va’da qilingan uchta tank Ukrainaga yetkazilgan. Bu jangovar mashinalar Rossiya bosqinini yengish uchun juda muhim ahamiyat kasb etishi qayd etilgan. Moskva esa G‘arb qurollarining yetkazib berilishini xavfli provokatsiya deb atamoqda.

Eslatib o‘tamiz, joriy yilning 24 fevral kuni Polsha ham Ukrainaga Germaniyada ishlab chiqarilgan tanklarning birinchi partiyasi yuborgandi. Kanada esa fevral oyi boshida Ukrainaga birinchi Leopard 2 tankini jo‘natgandi.