Украинага Leopard 2 танкларининг биринчи партияси юборилди

Германияда ишлаб чиқарилган Leopard 2 танкларининг биринчи партияси бугун, 24 февраль Польшадан Украинага жўнатилади. Бу ҳақда “Bloomberg” хабар берди.

Қайд этилишича, Польша ваъда қилган 14 та Leopard 2 жанговар танкларининг биринчи партиясини Россия босқинига бир йил тўлган кун – 24 февраль куни жўнатади. Бунинг ортидан рамзий маъно кўзланган бўлиб, бу Ғарб давлатлари Кремль буйруғи билан кучайган ҳужумлар фонида курашаётган Украина Қуролли кучларини қуроллантиришга шошилётганини англатади. 

Манбага кўра, танкларнинг етказиб берилиши Польша Бош вазири Матеуш Моравецкийнинг бугун, 24 февраль куни Киевга қилган ташрифидан сўнг маълум бўлган. У  Михайловск майдонида украиналик ҳамкасби Денис Шмигаль билан учрашган ва Олтин гумбазли монастирда ҳалок бўлганлар хотирасига ҳурмат бажо келтирган.  

Маълумот учун, Буюк Британия, Норвегия, Словакия, АҚШ ва Франция ҳам Киевга Ғарбда ишлаб чиқарилган танклар бериш ниятида эканини эълон қилган. Киев биринчи партия сифатида 12 та давлатдан 140 тагача танк олиши кутилмоқда.

Алибек Бейжанов