Ilon Mask qo‘rqdimi? Milliarder jang o‘rniga debat o‘tkazishni o‘ylamoqda

Dunyoning eng boy odami Ilon Mask milliarder Mark Sukerberg bilan qafasda jang qilish o‘rniga “madaniyatli” debat o‘tkazish haqida o‘ylamoqda. Bu haqda u o‘zining X (sobiq Twitter)dagi sahifasida ma’lum qilgan. 

Dastlab, TED notijorat tashkiloti asoschisi Kris Anderson o‘z sahifasida qafas jangi o‘rniga debat o‘tkazishni taklif qilib, post qoldirgan va ushbu bahs tarixda eng tomoshabopi bo‘lishini yozgan. Bunga javoban Mask: 

“Bu ham yaxshi fikrga o‘xshaydi. Bahslashish haqiqatan ham olijanob sport turi (shunga ishonaman). Biz, shuningdek, kamtarlik bilan ilgari ezgu maqsadlar uchun kurashganlarga hayratimizni bildirishga umid qilamiz”, deb yozgan. 

Aftidan, Maskning Sukerberg bilan jang qilish ishtiyoqi so‘ngan. U avvalroq bo‘yni va orqa miyasini magnit-rezonans tomografiyasi yordamida tekshirtirishini ma’lum qilgandi. 

Ehtimol, Maskning jangdan avval bunday bayonotlar berishiga uning raqibi Sukerberg so‘nggi paytlarda jismoniy tayyorgarlikka ko‘proq urg‘u berayotgani sabab bo‘lgandir. Boisi Meta egasi yaqinda jiu-jitsu bo‘yicha ko‘k belbog‘ni qo‘lga kiritdi. Shuningdek, u UFC chempionlari  —Yangi Zelandiya vakili Israel Adesanya (o‘rta vazn) va Aleksandr Volkanovski (yarimengil vazn) bilan mashg‘ulot o‘tkazib, jarayondan suratlarni ijtimoiy tarmoqqa joylagandi. Maskning jangga tayyorgarligi esa ko‘ngildagidek ketayotgani yo‘q. Yaqinda u UFC'ning yengil vazn toifasidagi sobiq chempioni Habib Nurmuhammedovga murabbiylik qilish taklifini berdi va rad javobini oldi. 

Eslatib o‘tamiz, avvalroq Sukerberg Maskka jangni joriy yilning 26 avgust sanasida o‘tkazishni taklif qilgan edi. Biroq Ilon Mask bunga rozi bo‘lishi ehtimoli kam. Bundan tashqari, mazkur jang o‘tadigan manzil ham hozircha aniq emas, ammo Italiya Madaniyat vaziri Mask bilan bog‘lanib, unga jangni Kolizeyda o‘tkazishni taklif qilgan. Agar kutilayotgan jang rostdan ham o‘tkazilsa, u X (sobiq Twitter) ijtimoiy tarmog‘ida jonli efirda namoyish etiladi va barcha tushumlar keksalarga yordam berish uchun o‘tkazib beriladi. Bu haqda Ilon Maskning  o‘zi ma’lum qilgan.