Ilhom Aliyev ham Bishkekda orden bilan taqdirlandi (video)

Qirg‘iziston poytaxti Bishkek shahrida Ozarbayjon Prezidenti Ilhom Aliyev taniqli qirg‘iz yozuvchisi Chingiz Aytmatov nomidagi orden bilan taqdirlandi. Bu haqda Prezident matbuot xizmati xabar berdi. 

Qayd etilishicha, Bishkekda Ilhom Aliyev taniqli qirg‘iz yozuvchisi Chingiz Aytmatov uy-muzeyiga tashrif buyurgan va yozuvchi nomidagi orden bilan taqdirlangan. Bu ordenni Ozarbayjon yetakchisiga qirg‘iz yozuvchisining o‘g‘li – rassom Eldar Aytmatov topshirgan. Eldar Aytmatovga ko‘ra, Prezidentga ordenni topshirish uning uchun katta sharaf bo‘lgan.

Muzey Bishkek yaqinidagi “Ala-Archa” davlat qarorgohida joylashgan bo‘lib, yozuvchi umrining so‘nggi 20 yilini shu yerda o‘tkazgan. Hozirda bu yerda uning turmush o‘rtog‘i Mariya Aytmatova va o‘g‘li Eldar yashamoqda.

“Zamonaviy dunyoda va umumiy madaniy merosimizni saqlashdagi rolingiz uchun chuqur hurmat va faxr bilan sizga “Chingiz Aytmatov” ordenini topshiraman”, dedi Eldar Aytmatov.

Shuningdek, Ilhom Aliyev uy-muzeyning xotira kitobiga yozuv qoldirgan.

Qayd etish joiz, “Chingiz Aytmatov” ordeni adabiyot, kinematografiya va boshqa san’at sohalarida, shuningdek, ularni xalqaro miqyosda rivojlantirish va targ‘ib qilishda katta yutuqlarga erishgan Qirg‘iziston fuqarolariga topshiriladi. Maxsus xizmatlar uchun bu orden xorijiy fuqarolarga ham berilishi mumkin.

Ma’lumot uchun, Ilhom Aliyev ertaga, 6 noyabr kuni respublika poytaxti Bishkekda boshlanadigan Turkiy davlatlar tashkiloti (TDT)ga a’zo davlatlar yetakchilarining XI sammitida ishtirok etadi. TDT sammitida tashkilotga a’zo beshta davlat – Ozarbayjon, Qozog‘iston, Qirg‘iziston, Turkiya va O‘zbekiston yetakchilari, shuningdek, kuzatuvchi davlatlar – Vengriya va Turkmaniston rahbarlari ham qatnashadi.

Eslatib o‘tamiz, avvalroq Qirg‘iziston Prezidenti Sadir Japarov Turkiya Prezidenti Rajab Toyib Erdo‘g‘anga mamlakatning birinchi darajali mukofoti “Manas” ordenini topshirgan edi. Orden Bishkekdagi Prezident administratsiyasining yangi binosida rahbarlar yig‘ilishi paytida tantanali ravishda topshirilgan.