Germaniya vitse-kansleri kutilmaganda Kiyevga bordi

Germaniya Iqtisodiyot vaziri, Germaniya vitse-kansleri Robert Xabek bugun, 18 aprel kuni oldindan e’lon qilinmagan tashrif bilan iqtisodiy delegatsiya hamrohligida Kiyevga yetib bordi. Bu haqda “Deutsche Welle “ xabar berdi.

Vitse-kanslerning Ukraina tomoni bilan muzokaralarining muhim mavzusi Rossiyaning mamlakat energetika infratuzilmasiga buzg‘unchi hujumlari oqibatlari va uni tiklashda yordam berish, shuningdek, Ukraina iqtisodiyoti hamda Ukraina va Germaniya o‘rtasidagi iqtisodiy munosabatlarni mustahkamlash yo‘llari bo‘lishi kerak.

Bundan tashqari, Xabek iyun oyida Berlinda bo‘lib o‘tadigan Ukrainani tiklash bo‘yicha konferensiyani tayyorlash ustida ishlamoqchi. Germaniya Iqtisodiyot vazirining o‘zi Kiyevga kelgach, uning Ukrainaga safari bu mamlakat “ozodlik uchun kurashda” ayniqsa qo‘llab-quvvatlashga muhtoj bo‘lgan bir vaqtda sodir bo‘layotganini ta’kidladi.

“Ha, Ukraina o‘z taqdirini o‘zi belgilashi, hududiy yaxlitligi uchun, Putinning tajovuzkorligiga qarshi kurashmoqda, biroq u Yevropani birlashtiruvchi va xarakterlovchi qadriyatlar uchun ham kurashmoqda. Vaziyat, albatta, qiyin, lekin ukrainaliklar so‘nggi ikki yil ichida o‘z pozitsiyalarini qayta-qayta ushlab turishga muvaffaq bo‘ldi va Germaniya ularni qo‘llab-quvvatlash uchun qo‘lidan kelgan barcha ishni qiladi”, deydi Xabek.

Rossiyaning iqtisodiy sanksiyalarni chetlab o‘tishini sharhlar ekan, Xabek bunga qarshi "Yevropa va Germaniya darajasida" kurashishga va’da berdi.

"Sanksiyalar hurmat qilinishi kerak va ularni chetlab o‘tish arzimas huquqbuzarlik emas", deydi vazir.

Safar davomida Robert Xabekga IRIS-T SLM havo mudofaa tizimlarini ishlab chiqaruvchi Diyehl Defense mudofaa kompaniyasi rahbari Helmut Rauch hamrohlik qildi.

"Bizning uzoq muddatli maqsadimiz, albatta, bu tizimlarni Ukrainada mahalliy sharoitda saqlash, ta’mirlash va hokazolar bo‘lishi mumkin", dedi u.

Qayd etish joizki, bugungi kunga qadar Diehl Defence Ukrainaga uchta IRIS-T SLM havo mudofaa tizimini yetkazib bergan. Bu tizim Kiyev mudofaasi uchun qo‘llaniladi.

Germaniya delegatsiyasining Kiyevdagi yana bir a’zosi Quyosh energiyasi ishlab chiqaruvchilari federal uyushmasi (Bundesverband Solarwirtschaft) rahbari Yorg Marius Ebeldir. Uning so‘zlariga ko‘ra, u Ukrainada ushbu sanoat sektori uchun katta imkoniyatlarni ko‘radi. Ebel ziddiyatli vaziyatlarda quyosh elektr stansiyalarining afzalliklarini ta’kidladi, chunki ularni "bir zarbada buzish yoki hatto yopish mumkin emas". Bundan tashqari, quyosh energiyasini ishlab chiqarish uchun modullarni tezda o‘rnatish mumkin.

"Shunday qilib, bu Ukrainada elektr va tok ishlab chiqarish uchun ideal shakldir", deb xulosa qildi Ebel.

Robert Xabek Kiyevda mamlakat Prezidenti Vladimir Zelenskiy, shuningdek, Ukraina Bosh vaziri o‘rinbosari, Iqtisodiyot vaziri Yuliya Sviridenko va Energetika vaziri German Galushchenko bilan uchrashishi kutilmoqda. Keyin Germaniya Bosh vaziri o‘rinbosari Moldovaga boradi, u ham Rossiya Federatsiyasi tahdididan qo‘rqadi.