Germaniya Ozarbayjondan uzr so‘radi

Germaniya ma’muriyati Ozarbayjondan Germaniya Prezidenti Frank-Valter Shtaynmayerning ijtimoiy tarmoqdagi akkauntida noaniq bayroq va Qorabog‘ga tegishli bo‘lgan matn e’lon qilingani uchun uzr so‘radi. Bu haqda “Azertag” xabar berdi.

Uzr matnida aytilishicha, Shtaynmayerning ijtimoiy tarmoqlarida qisqa vaqt davomida noaniq bayroq va Ozarbayjon (Qorabog‘) mintaqalaridan biriga tegishli matn joylashtirilgan. Xatolik aniqlangach, bu post olib tashlangan. Qayd etilishicha, tegishli post texnik xato natijasi bo‘lib, Germaniyaning Ozarbayjon hududiy yaxlitligi borasidagi pozitsiyasi doirasida hech qanday ahamiyatga ega emas.

Germaniya Prezidenti ma’muriyati rahbari, davlat kotibi Derte Dinger Ozarbayjon Prezidenti yordamchisi Hikmat Hojiyevga murojaatida bu xatodan juda xafa bo‘lganini va ushbu post Ozarbayjondagi ba’zi odamlarda noto‘g‘ri taassurot qoldirgani uchun uzr so‘rashini ta’kidlagan.

Dingerning qo‘shimcha qilishicha, Shtaynmayerning 1-2 aprel kunlari Bakuga bo‘lajak tashrifi Ozarbayjon-Germaniya hamkorligini mustahkamlash va Janubiy Kavkazda tinchlik jarayonini qo‘llab-quvvatlashga qaratilgan.

Ma’lumot uchun, kecha, 31 mart kuni Ozarbayjon Tashqi ishlar vazirligi Germaniyaning Bakudagi elchisi Ralf Xorlemannni chaqirtirgan va unga Shtaynmayerning posti tufayli qat’iy norozilik bildirgan. Diplomatik idoraning ta’kidlashicha, Baku Germaniya Prezidentining postini Berlinning Ozarbayjon suvereniteti va hududiy yaxlitligini qo‘llab-quvvatlash haqidagi bayonotlariga zid bo‘lgan “ochiq siyosiy provokatsiya” deb hisoblaydi. Baku nemislardan post uchun uzr so‘rashni talab qilgandi.

Eslatib o‘tamiz, avvalroq Armaniston Bosh vaziri Nikol Pashinyan arman xalqini Qorabog‘dan voz kechishga chaqirgandi. Uning so‘zlariga ko‘ra, o‘zaro da’volardan voz kechish kerak, shu jumladan xalqaro sudlardagi da’volardan ham.