Германия Озарбайжондан узр сўради

Германия маъмурияти Озарбайжондан Германия Президенти Франк-Вальтер Штайнмайернинг ижтимоий тармоқдаги аккаунтида ноаниқ байроқ ва Қорабоғга тегишли бўлган матн эълон қилингани учун узр сўради. Бу ҳақда “Azertag” хабар берди.

Узр матнида айтилишича, Штайнмаернинг ижтимоий тармоқларида қисқа вақт давомида ноаниқ байроқ ва Озарбайжон (Қорабоғ) минтақаларидан бирига тегишли матн жойлаштирилган. Хатолик аниқлангач, бу пост олиб ташланган. Қайд этилишича, тегишли пост техник хато натижаси бўлиб, Германиянинг Озарбайжон ҳудудий яхлитлиги борасидаги позицияси доирасида ҳеч қандай аҳамиятга эга эмас.

Германия Президенти маъмурияти раҳбари, давлат котиби Дерте Дингер Озарбайжон Президенти ёрдамчиси Ҳикмат Ҳожиевга мурожаатида бу хатодан жуда хафа бўлганини ва ушбу пост Озарбайжондаги баъзи одамларда нотўғри таассурот қолдиргани учун узр сўрашини таъкидлаган.

Дингернинг қўшимча қилишича, Штайнмайернинг 1-2 апрель кунлари Бакуга бўлажак ташрифи Озарбайжон-Германия ҳамкорлигини мустаҳкамлаш ва Жанубий Кавказда тинчлик жараёнини қўллаб-қувватлашга қаратилган.

Маълумот учун, кеча, 31 март куни Озарбайжон Ташқи ишлар вазирлиги Германиянинг Бакудаги элчиси Ральф Хорлеманнни чақиртирган ва унга Штайнмайернинг пости туфайли қатъий норозилик билдирган. Дипломатик идоранинг таъкидлашича, Баку Германия Президентининг постини Берлиннинг Озарбайжон суверенитети ва ҳудудий яхлитлигини қўллаб-қувватлаш ҳақидаги баёнотларига зид бўлган “очиқ сиёсий провокация” деб ҳисоблайди. Баку немислардан пост учун узр сўрашни талаб қилганди.

Эслатиб ўтамиз, аввалроқ Арманистон Бош вазири Никол Пашинян арман халқини Қорабоғдан воз кечишга чақирганди. Унинг сўзларига кўра, ўзаро даъволардан воз кечиш керак, шу жумладан халқаро судлардаги даъволардан ҳам.