Futbolchilar sotuvidan “soqqa qilgan” “Ayntraxt”

Germaniyaning o‘rtamiyona klublari qatorida e’tirof etiladigan va deyarli har transferlar oynasida futbolchilarni qimmat narxga sotib, hisobini to‘ldirib oladigan “Ayntraxt”ning transfer siyosatiga nazar solamiz.

Yasper Lindstryum (vinger)

Daniyalik futbolchi “Ayntraxt” safiga 2021 yilda “Brondbyu” klubidan 7 million yevro evaziga ko‘chib o‘tgandi. 2023 yilning yoziga qadar Germaniya chempionatida to‘p tepgan vinger klub safida 57 ta o‘yinda 12 ta gol urdi. “Ayntraxt” Yasperni 30 million yevroga “Napoli”ga sotib yubordi.

Andre Silva (hujumchi)

Klub Portugaliya terma jamoasi hujumchisi Andre Silvani 2019 yilda “Sevilya”dan 3 million yevroga sotib oldi. Silva klub tarkibida 50 ta o‘yinda 40 ta gol urishga muvaffaq bo‘ldi. Shundan so‘ng, “Ayntraxt” hujumchini 30 million yevroga “Leypsig”ga sotib yubordi.

Villian Pacho (himoyachi)

Kolumbiyalik futbolchi 2023 yilda Belgiyaning “Antverpen” klubidan 14 million yevro evaziga “Ayntraxt” safiga kelib qo‘shiladi. 2023/24 yilgi mavsumda u 33 ta o‘yinda maydonga tushdi. So‘ngra “Ayntraxt” 23 yoshli futbolchini 40 million yevroga PSJga sotib yuboradi.

Sebastyan Aller (hujumchi)

Aller 2017 yilda Niderlandiyaning “Utrext” klubidan 12 million yevro evaziga “Ayntraxt” futbolchisiga aylangan. U nemis klubi safida 60 ta o‘yinda maydonga tushib, 24 ta gol urdi. Keyin “Ayntraxt” 2019 yilda “Vest Xem”ga 50 million yevroga sotdi.

Luka Yovich (hujumchi)

Xorvatiyalik futbolchi 2017 yilda 22 million yevro evaziga “Ayntraxt”ga kelib qo‘shildi.  Yovich klub safida 2 mavsum faoliyat olib bordi va 54 ta o‘yinda 25 ta gol urdi. 2019 yilda esa hujumchi 63 million yevroga “Real Madrid”ga sotildi.

Randal Kolo-Muani (hujumchi)

Fransiyalik hujumchi 2022 yilda erkin agent sifatida “Ayntraxt” futbolchiciga aylandi. 2022/23 yilgi mavsumda u nemis klubi tarkibida 34 ta o‘yinda maydonga tushib, 16 marotaba raqiblar darvozasini ishg‘ol qilgan. 2023 yilning yozida “Ayntraxt” Kolo-Muanini PSJga 95 million yevro evaziga sotgan va o‘z hisobini mo‘maygina pullar bilan to‘ldirib olgan.

Omar Marmush (hujumchi) 

Misrlik futbolchi 2023 yilda erkin agent sifatida “Ayntraxt” safiga kelib qo‘shiladi. Marmush klub tarkibida 46 ta o‘yinda maydonga tushib, 27 ta gol urdi va 14 ta assist qayd etdi. 2025 yilning yanvar oyida u “Manchester Siti”ga bonuslarni hisobga olganda 75 million yevroga ko‘chib o‘tdi.