Fransiyada 2 ta tramvay to‘qnashib ketdi (video)

Fransiyaning Strasburg shahri markaziy stansiyasida ikki tramvay to‘qnashib ketishi oqibatida kamida 30 kishi jarohat oldi. Hodisa paytida stansiya ichiga tutun to‘lgan va yo‘lovchilarning vahimali qichqiriqlari eshitilgan. Bu haqda “The Sun” xabar berdi.

Voqea joyidan olingan videolarda yo‘lovchilar tramvayning eshiklarini buzib, ichkaridan odamlarni olib chiqishga urinayotgani aks etgan. Tramvaylar platformada bir-biriga urilgan holatda, ularning old va orqa qismlari jiddiy shikastlangan.

Hodisa oqibatida bir tramvayning relsdan chiqib ketgani aytilmoqda. Mahalliy nashrlar ma’lumotiga ko‘ra, baxtsiz hodisa bir tramvay noto‘g‘ri relsga o‘tib ketishi oqibatida yuzaga kelgan bo‘lishi mumkin.

“Strasburg markaziy bekatida tramvay halokati sodir bo‘ldi. Ko‘plab qutqaruv xizmatlari safarbar etilgan”, deyiladi yong‘in va qutqaruv xizmati bayonotida.

Politsiya hodisadan so‘ng markaziy stansiyadagi tramvay qatnovi to‘xtatilganini e’lon qilgan. Mahalliy hukumat tomonidan hodisa yuzasidan tergov boshlangan. Hozirda qutqaruv operatsiyalari davom etmoqda, jabrlanganlar orasida bir necha kishining ahvoli og‘ir ekani haqida ma’lumotlar bor.

Eslatib o‘tamiz, avvalroq Rossiyaning Murmansk viloyati janubida yo‘lovchi poyezdi yuk poyezdi bilan to‘qnashib ketgan edi. Hodisa Murmansk – Sankt-Peterburg yo‘nalishida harakatlangan ikki qavatli yo‘lovchi poyezdi ishtirokida sodir bo‘lgan.