Fransiya ham Suriya bilan diplomatik aloqalarni qayta tiklamoqchi

Fransiya Tashqi ishlar vazirligi 2012 yilda diplomatik aloqalar uzilganidan beri ilk bor Suriyaga to‘rt nafar diplomat yuborishga qaror qildi. Bu haqda “France 24” xabar berdi.

Bugun, 17 dekabr kuni ertalab diplomatik missiya Fransiya elchixonasi joylashgan Damashqqa Suriyaning yangi rasmiylari bilan “dastlabki aloqalarni o‘rnatish” uchun yetib borgan. 

Fransiya Tashqi ishlar vaziri vazifasini bajaruvchi Jan-Noel Barrotning so‘zlariga ko‘ra, diplomatlarning maqsadi “Fransiyaning Suriyadagi ta’sirini tiklash”, “yangi hokimiyat bilan dastlabki aloqalarni o‘rnatish” va “aholining gumanitar ehtiyojlarini baholash” bo‘ladi.

Fransiya 2012 yilda Suriya bilan diplomatik aloqalarini uzgan. Barrot Suriyada bir necha yuz fransuz fuqarosi borligi, Parij esa Ruminiya elchixonasi va Bayrutdagi diplomatik vakolatxonasi orqali Suriyadagi rasmiylar bilan aloqa o‘rnatganini aytdi.

Parij avvalroq Suriyada muxolifat hokimiyatni qo‘lga kiritganini olqishlagan edi. Barrot Suriyadagi yangi hokimiyatni “rag‘batlantiruvchi” va “tahqirlovchi emas” deb ta’riflagan. Shuningdek, u Fransiya Suriya muxolifatini siyosiy o‘tish jarayonida faqat barcha vakillarning manfaatlarini hisobga olgan holda qo‘llab-quvvatlashini aytgan edi.

Buyuk Britaniyaning Suriyadagi sobiq elchisi, Yaqin Sharq bo‘yicha ekspert Piter Fordning RIA Novostiga avvalroq aytganidek, G‘arb Suriyada “o‘tish davri” deb atalmish ushbu vaziyatdan qurolli muxolifat hokimiyatni qo‘lga kiritgandan so‘ng, mamlakatning yangi rahbariyati bilan qulay munosabatlar o‘rnatish zarurati tufayli foydalanadi.

Avvalroq “Le Figaro” nashrining Fransiya Milliy aksilterror prokuraturasi prokurori Kristin Olivega tayanib xabar berishicha, hujumda “Hayat Tahrir ash-Shom” harakatining o‘nlab fransuzlar, xususan, Umar Omsen brigadasi ishtirok etgan. Ular orasida Fransiyada sudlangan jangarilar ham bor.

Fransuz matbuoti ta’kidlaganidek, Fransiya Suriya hududida jihodchilar, ayniqsa fransuzlar borligi va bu tahdidni Yevropaga eksport qilinishi xavfidan xavotirda.

Fransiyaning Qochqinlar va fuqaroligi bo‘lmagan shaxslarni himoya qilish boshqarmasi (OFPRA) ma’lumotlariga ko‘ra, hozirda mamlakatda 2011 yildan beri boshpana olgan 45 mingga yaqin suriyalik bor. 2023 yilda Fransiya Suriya fuqarolaridan boshpana so‘rab murojaat qilgan deyarli 4,5 ming arizani ro‘yxatga olgan va 2024 yil boshidan beri yana 2500 ta ana shunday ariza olingan.

Eslatib o‘tamiz, avvalroq Suriya poytaxti Damashqdagi Turkiya elchixonasida 12 yillik tanaffusdan keyin ushbu mamlakat missiyasi o‘z faoliyatini qayta boshlagandi. 2012 yilda faoliyatini to‘xtatgan elchixona rasmiy ravishda Turkiyaning Mavritaniyadagi elchisi Burhon Ko‘ro‘g‘li bilan vaqtincha ishlar vakili vazifasini bajaruvchi sifatida ochildi.