“Flydubai” samolyotida Dubay-Toshkent yo‘nalishida ilk parvoz amalga oshirildi

Kecha, 11 mart kuni “Flydubai” aviakompaniyasi tomonidan Dubaydan Toshkentga to‘g‘ridan-to‘g‘ri aviaparvoz amalga oshirildi. Bu bilan mazkur kompaniya Birlashgan Arab Amirliklarida faoliyat yuritayotgan aviakompaniyalar orasida to‘g‘ridan-to‘g‘ri reyslarni taqdim qiluvchi ilk kompaniyaga aylandi. Bu haqda “Xalq so‘zi” xabar bermoqda. 

Aytish joizki, Dubay-Toshkent oralig‘ida to‘g‘ridan-to‘g‘ri havo qatnovining yo‘lga qo‘yilishi ikki mamlakat o‘rtasidagi savdo-iqtisodiy aloqalarni yanada mustahkamlash uchun muhim qadam bo‘lib, manfaatli loyihalarga imkon yaratuvchi tashriflarni amalga oshirishni ko‘zda tutadi.

Mazkur yo‘nalishdagi parvozlar haftasiga besh marta amalga oshiriladi. Joriy yilning 31 mayidan boshlab esa yo‘lovchilar har kuni “Flydubai” kompaniyasi xizmatlaridan foydalanishlari mumkin bo‘ladi.

Dubaydan Toshkentga ekonom-klassning borish-kelish tarifi 420 AQSH dollaridan boshlanadi. Bu narx 20 kilogramm yuk va ovqatni o‘z ichiga oladi.