Fayzullayevga “Bavariya” qiziqish bildirayotgani tasdiqlandi

O‘zbekiston milliy terma jamoasi va Moskvaning SSKA klubi a’zosi Abbosbek Fayzullayevga Germaniyaning “Bavariya” klubi qiziqayotgani rost. Bu haqda futbolchining o‘zi “Championat” nashriga bergan intervyusida aytib o‘tdi.

“Men “Bavariya”ning qiziqishi haqida hech narsa bilmasdim, xabarlarni internetda o‘qidim. Myunxen klubining e’tiboriga normal qarayman. Bilishimcha, “Bavariya”ning mening agentim bilan haqiqatdan ham ma’lum aloqalari bo‘lgan. Germaniya klubining qiziqishini xotirjam qabul qilaman va bu hali hech narsani anglatmaydi. Hozir bor  e’tiborimni SSKAga qaratganman, oldinda muhim o‘yinlar bor, lekin “Bavariya” yaxshi variant, albatta”, deydi Fayzullayev.

Qayd etish joiz, fevral oyi boshida Fayzullayevning o‘yinlarini “Bavariya” klubi skautlari kuzatib borayotgani haqida xabarlar tarqalgandi. 

Myunxenliklar futbolchini U-23 terma jamoada o‘ynaganida ham uning xatti-harakatlarini katta qiziqish bilan kuzatgan va hozirda Fayzullayev nemis skautlari “nishonida” turibdi.

Eslatib o‘tamiz, avvalroq 20 yoshli futbolchi Moskva klubiga moslashuvi haqida fikr bildirgandi.