Farg‘onadagi kompyuter klubida janjallashganlar qamoqqa olindi

Farg‘ona shahridagi “Verona” kompyuter o‘yinlari klubida o‘yin o‘ynashga borgan yigitlar kelishmovchilik sabab klub xodimini kaltakladi. Bu haqda Farg‘ona viloyati IIB xabar berdi.

Qayd etilishicha, joriy yilning 21 fevral kuni Farg‘ona shahar Oftob ko‘chasida joylashgan kompyuter o‘yinlari klubida yetti nafar tanishlar o‘zaro baqir-chaqir qilib, kompyuter o‘ynagani uchun klub ish boshqaruvchisi F.X. tomonidan ularga e’tiroz bildirilgan.

O‘zaro kelishmovchilik sababli fuqaro O.V. uning yuz qismiga urib yuborgan va janjalga uning sheriklari ham qo‘shilishgan.

Hozirda mazkur holat yuzasidan Jinoyat kodeksining 277-moddasi (Bezorilik) 3-qismi “g” bandi bilan jinoyat ishi qo‘zg‘atilib, gumonlanuvchilar O.V., M.Q. hamda N.M.larga nisbatan qamoqqa olish tarzidagi ehtiyot chorasi qo‘llanilgan. Shuningdek, ularning yana uch nafar sheriklariga nisbatan ma’muriy tartibda bayonnoma rasmiylashtirilgan.

Mazkur holat viloyat IIB tomonidan nazoratga olingan. Yakuniga ko‘ra qonun ustuvorligi, jazo muqarrarligi ta’minlanishi bildirilgan.

Eslatib o‘tamiz, o‘tgan oyda Toshkent shahridagi shifoxonalardan biriga kelib, shifokorlarni kaltaklagan bemorning do‘stlari 3 yilga qamalgandi. Holat yuzasidan Jinoyat ishlari bo‘yicha Shayxontohur tuman sudida bo‘lib o‘tgan sudda tibbiyot xodimlariga qo‘l ko‘targan 3 shaxs Jinoyat kodeksining 277-moddasi (bezorilik) 3-qismi “g” bandida nazarda tutilgan jinoyatni sodir etgan deb topildi va ularning har biriga nisbatan 3 yil muddatga ozodlikdan mahrum qilish jazosi tayinlandi. Jazoni manzil-koloniyada o‘tash belgilandi.

Sara Komiljonova