Eron Rossiyaning Yak-130 samolyotini jangovar tayyorgarlikdan o‘tkazdi – OAV

Rossiyada ishlab chiqarilgan Yak-130 jangovar o‘quv samolyoti Eronga yetkazildi. Bu haqda IRNA davlat agentligi xabar berdi.

IRNA ma’lumotlariga ko‘ra, Rossiyaning Yak-130 samolyotlari Eronga olib kelingan va mamlakat Harbiy-havo kuchlari xizmatiga kirgan.

Ushbu samolyotlar mamlakat Harbiy-havo kuchlarining yangi avlod qiruvchi samolyotlarini boshqaradigan yangi uchuvchilarni tayyorlashda foydalaniladi. Agentlik Eronga qancha samolyot yetkazib berilgani haqida xabar bermagan.

“Menadefense.net” xabariga ko‘ra, birinchi Yak-130 transport samolyotlari orqali yetkazilgan. Keyin ular yig‘ilib, 1 sentyabr kuni Isfahondagi aviabazadan sinov parvozlarini amalga oshirgan.

“Tasnim” xabariga ko‘ra, modernizatsiya qilingan samolyot eronlik harbiy uchuvchilarga Su-57 kabi beshinchi avlod va 4++ qiruvchi samolyotlarni boshqarishga o‘rgatish imkonini beradi.

Yak-130 samolyotlari 3 tonna o‘q-dorilarni tashish, yengil hujum va razvedka missiyalarini bajarishga qodir.