Erdo‘g‘an Zelenskiyga qo‘ng‘iroq qilib, yana “dallollik”ni taklif qildi

Turkiya Respublikasi Prezidenti Rajab Toyib Erdo‘g‘an bugun, 28 sentyabr kuni ukrainalik mavqedoshi Vladimir Zelenskiy bilan telefon orqali suhbatlashdi va u Zaporoje atom elektr stansiyasi atrofida qurolsizlantirilgan hudud yaratish uchun vositachilik qilishni taklif qildi. Bu haqda Turkiya Prezidenti ma’muriyati Aloqa boshqarmasi ma’lum qildi. 

“Prezident Erdo‘g‘an, Rossiya va Ukraina o‘rtasida uzoq vaqtdan beri ishlab kelayotgan mahbuslar almashinuvi muvaffaqiyatli yakunlanganidan chuqur mamnunligini bildirdi. Ukraina g‘allasini Qora dengiz orqali eksport qilish bo‘yicha kelishuv amalga oshayotganini ta’kidlagan. U shunday yondashuvni Zaporoje atom elektr stansiyasi kontekstida ham ko‘rsatish mumkinligini va stansiya atrofida qurolsizlantirilgan hududni yaratishda zarur vositachilik va yordam ko‘rsatish bo‘yicha taklif haqiqiy ekanligini aytdi”, deyiladi idora xabarida.  

21 sentyabr kuni MAGATE bosh direktori Rafael Grossi BMT Bosh Assambleyasining 77-sessiyasi doirasida bir qator uchrashuvlar o‘tkazganini, jumladan, Rossiya Tashqi ishlar vaziri Sergey Lavrov, Ukraina Tashqi ishlar vaziri Dmitriy Kuleba va Fransiya Prezidenti Emmanuel Makron bilan uchrashganini ma’lum qildi. Unda u Zaporoje AES atrofida xavfsizlik zonasini yaratishni muhokama qilingan. Grossi Ukraina Bosh vaziri Denis Shmigal va Yevropa Ittifoqi diplomatiyasi rahbari Jozep Borrel bilan ham uchrashuvlar o‘tkazgan. Bundan tashqari, MAGATE rahbari agentlik yaqin kunlarda Zaporoje AESdagi missiya tarkibini kengaytirish niyatida ekanini aytgan. 

Keyinroq Grossi MAGATE Bosh konferensiyasining 66-yillik sessiyasi doirasida Rossiya va Ukrainaga xavfsizlik zonasini yaratish bo‘yicha muzokaralarni davom ettirish rejalari haqida gapirgan. U buni “iloji bo‘lsa” shu haftada amalga oshirishga umid qilmoqda. Shuningdek, u ushbu tashabbus bo‘yicha davom etayotgan muzokaralarda muvaffaqiyatga erishilganini ma’lum qildi. 

Energodarda joylashgan Zaporoje AES Rossiya qo‘shinlari nazorati ostida qolmoqda. Sentyabr oyi boshida stansiyaga Grossi boshchiligidagi MAGATE missiyasi tashrif buyurdi. Missiya stansiyani tark etgach, agentlikning ikki xodimi kuzatuvchi sifatida unda qoldi. Keyinroq MAGATE harbiy harakatlar oqibatida avariyalarning oldini olish uchun Zaporoje AES atrofida xavfsizlik zonasini yaratishga chaqiruvchi hisobotini chop etdi.