Egizaklariga guvohnoma olishga chiqqan falastinlikning uyi bombalandi

G‘azo shimolidan Dayr al-Balohga ko‘chirilgan falastinlik Muhammad Abu Al-Qumsan to‘rt kunlik egizaklari uchun tug‘ilganlik haqidagi guvohnoma olishga chiqqanida uning uyi Isroil harbiy-havo kuchlari tomonidan bombalandi. Bu haqda “The Hill” xabar berdi.

Oqibatda erkak uyga qaytganida, Isroil havo hujumi oqibatida Al-Qumsanning xotini va yangi tug‘ilgan egizaklari halok bo‘lgani ma’lum bo‘ldi. Uning rafiqasi, farmatsevt Joumana Arafa to‘rt kun oldin egizaklarni dunyoga keltirganini Facebook'dagi sahifasida e’lon qilgan edi. Al-Qumsan mahalliy hukumat idorasiga tug‘ilishni qayd etish uchun ketgan. U o‘sha yerda bo‘lganida qo‘shnilari qo‘ng‘iroq qilib, markaziy Dayr al-Baloh shahri yaqinida boshpana qilgan uyi bombalanganini aytgan. Uning egizaklari ham, xotini ham halok bo‘lgan.

“Nima bo‘lganini bilmayman. Menga uyimga snaryad tushganini aytishdi”, degan u.

“Associated Press” xabariga ko‘ra, er-xotin urushning dastlabki haftalarida G‘azo shahrini evakuatsiya qilish to‘g‘risidagi buyruqni bajarib, armiya buyurganidek hudud markazidan boshpana izlagan.

G‘azo Sog‘liqni saqlash vazirligining da’vo qilishicha, 2023 yilning 7 oktyabridan buyon kamida 39 ming 929 falastinlik halok bo‘lgan va 92 ming 240 kishi yaralangan, so‘nggi 24 soat ichida 32 kishi halok bo‘lgan.