Эгизакларига гувоҳнома олишга чиққан фаластинликнинг уйи бомбаланди

Ғазо шимолидан Дайр ал-Балоҳга кўчирилган фаластинлик Муҳаммад Абу Ал-Қумсан тўрт кунлик эгизаклари учун туғилганлик ҳақидаги гувоҳнома олишга чиққанида унинг уйи Исроил ҳарбий-ҳаво кучлари томонидан бомбаланди. Бу ҳақда “The Hill” хабар берди.

Оқибатда эркак уйга қайтганида, Исроил ҳаво ҳужуми оқибатида Ал-Қумсаннинг хотини ва янги туғилган эгизаклари ҳалок бўлгани маълум бўлди. Унинг рафиқаси, фармацевт Жоумана Арафа тўрт кун олдин эгизакларни дунёга келтирганини Facebook'даги саҳифасида эълон қилган эди. Ал-Қумсан маҳаллий ҳукумат идорасига туғилишни қайд этиш учун кетган. У ўша ерда бўлганида қўшнилари қўнғироқ қилиб, марказий Дайр ал-Балоҳ шаҳри яқинида бошпана қилган уйи бомбаланганини айтган. Унинг эгизаклари ҳам, хотини ҳам ҳалок бўлган.

“Нима бўлганини билмайман. Менга уйимга снаряд тушганини айтишди”, деган у.

“Associated Press” хабарига кўра, эр-хотин урушнинг дастлабки ҳафталарида Ғазо шаҳрини эвакуация қилиш тўғрисидаги буйруқни бажариб, армия буюрганидек ҳудуд марказидан бошпана излаган.

Ғазо Соғлиқни сақлаш вазирлигининг даъво қилишича, 2023 йилнинг 7 октябридан буён камида 39 минг 929 фаластинлик ҳалок бўлган ва 92 минг 240 киши яраланган, сўнгги 24 соат ичида 32 киши ҳалок бўлган.