Ebola “quturmoqda”: 2,5 mingdan ortiq odam qurbon bo‘ldi

Kongoda Ebola epidemiyasi nazoratdan chiqib bormoqda, virus allaqachon 2 500 dan ortiq insonning hayotiga zomin bo‘ldi. Bu haqda “Reuters” xabar berdi.

BMTning Kongodagi Ebola bo‘yicha katta koordinatori Jyulen Xarneisning aytishicha, virus mamlakat shimoli-sharqida Fransiya hududidan ham katta hududga yoyilgan.

“Ebola epidemiyasi juda tez sur’atlarda kengayib bormoqda”, deya ta’kidladi Xarneis.

Uning so‘zlariga ko‘ra, epidemiyaga qarshi kurash uchun ajratilgan mablag‘lar bir necha hafta ichida tugashi mumkin. Bu esa vaziyatni yanada og‘irlashtirishi kutilmoqda.

Epidemiyaga qarshi kurashayotgan tibbiyot xodimlarining o‘zi ham virus qurboniga aylanmoqda.

Hozirgacha 160 nafar tibbiyot xodimi Ebola bilan kasallangan, ulardan 43 nafari vafot etgan.

Bundan tashqari, so‘nggi olti oy davomida tibbiyot xodimlariga qarshi 260 dan ortiq hujum qayd etilgan. Sakkiz nafar tibbiyot xodimi hujumlar oqibatida halok bo‘lgan.
Ayrim hududlarda mahalliy aholi tez yordam mashinalariga tosh otgan, avtomobillar yoqilgan, tibbiyot muassasalariga hujum qilingan.

BMT vakili buni aholining qo‘rquvi va tarqalgan turli fitna nazariyalari bilan izohlagan. Ayrim fuqarolar epidemiyani “uydirma” deb hisoblamoqda. Shuningdek, Ebola sababli marhumlarni dafn qilish bo‘yicha joriy etilgan cheklovlar ham aholining noroziligiga sabab bo‘lmoqda.

Bu Kongoda qayd etilgan 17-Ebola epidemiyasi bo‘lib, iyul oyining oxirida kasallanishlar soni bo‘yicha mamlakat tarixidagi eng yirik epidemiyaga aylangan.

Epidemiyaga Ebola virusining Bundibugyo turi sabab bo‘lmoqda. Hozircha ushbu virus turiga qarshi tasdiqlangan vaksina yoki maxsus davolash vositasi mavjud emas.
BMT vakili Kongoda uch o‘n yillik qurolli mojarolar ortidan allaqachon og‘ir gumanitar vaziyat yuzaga kelganini qayd etdi.

Tashkilotlar esa epidemiyaga qarshi kurashni davom ettirish uchun zudlik bilan qo‘shimcha mablag‘ va yordam zarurligini bildirmoqda.

Eslatib o‘tamiz, avvalroq Kongo Demokratik Respublikasida Ebola epidemiyasi tobora kuchayayotgani, mamlakatda virus bilan kasallanganlar soni 5021 nafarga yetgani haqida xabar berilgan edi.