Dzyudo: O‘zbekiston Jahon chempionatida birinchi o‘rinni egalladi

Dzyudo bo‘yicha O‘zbekiston terma jamoasi Fransiya poytaxti Parij shahrida davom etayotgan harbiylar o‘rtasidagi Jahon chempionatida muvaffaqiyatli ishtirok etmoqda.

Ulug‘bek Azizov va Tohir Fayziyev murabbiyligidagi o‘zbekistonlik dzyudochilar yakkalik bahslari yakuniga ko‘ra, 4 ta oltin, 1 ta bronza medali bilan umumjamoa hisobida birinchi o‘rinni egalladi. Diyora Keldiyorova (-52 kg), Dilshodjon Baratov (-60 kg), Davlat Bobonov (-90 kg) va Muzaffarbek To‘raboyev (-100 kg) jahon chempioniga aylangan bo‘lsa, Shohruh Baxtiyorov (+100 kg) bronza medaliga sazovor bo‘ldi. Bugun jamoaviy bahslar bo‘lib o‘tadi.

Ikkinchi o‘rinni braziliyalik dzyudochilar 3 ta oltin, 4 ta kumush, 4 ta bronza medali bilan band etdi, kuchli uchlik Fransiya terma jamoasiga nasib etdi. Mezbonlar 3 ta oltin, 3 ta kumush, 4 ta bronza medaliga ega chiqishdi. Avstriya 2 ta oltin, Rossiya va Slovakiya terma jamoalari 1 tadan oltin medalni qo‘lga kiritdi.

Ma’lumot uchun, Tokio Olimpiadasi sovrindori Davlat Bobonov Xalqaro dzyudo federatsiyasi (IJF) reytingida birinchi o‘rinda qayd etilgan.