Dunyodagi eng katta qora olmos rekord summaga sotildi

Londondagi kim oshdi savdosida og‘irligi 555,55 karat bo‘lgan nodir qora olmos “Enigma” 3 million 161 ming funt sterlingga (4 million 292 ming 322 AQSH dollari) sotildi. Bu haqda savdolar o‘tkazilgan Londonning “Sotheby's” auksion uyi saytida e’lon qilindi.

“Xaridor xarid qilish uchun kriptovalyutadan foydalanishni tanladi”, dedi Sotheby's Twitter postida.

Qayd etilishicha, bu kimoshdi savdolari tarixidagi eng katta qirralangan olmosdir. U 2006 yilda Ginnesning rekordlar kitobiga kiritilgan.

Auksiondan keyin kriptovalyuta tadbirkori Richard Xerd ijtimoiy tarmoqlarda “Enigma”ni aynan u sotib olganini e’lon qilgan.

“To‘lov amalga oshirilgandan so‘ng va egalik huquqi qo‘lga kiritilgandan so‘ng, tosh HEX.com olmos sifatida rebrendlanadi”, degan u.

E’tiborlisi, HEX.com u asos solgan blokcheyn platformasining havolasidir.

Toshning kelib chiqishi haqida ko‘plab nazariyalar mavjud, jumladan, u Yerga asteroid bilan tushgan degan taxmin ham yo‘q emas. Qimmatbaho tosh - tabiiy olmosning eng qattiq shakllaridan biri bo‘lgan karbonadodan. Karbonadolar juda kam uchraydi va faqat Braziliya va Markaziy Afrika Respublikasida topilgan. Ularda faqat meteoritlarda uchraydigan mineral osbornit borligi sababli karbonado koinotdan kelgan deb taxmin qilinadi.