Diyora Usmonova turmush o‘rtog‘i bilan O‘zbekistonga qaytdi

O‘zbekistonlik taniqli xonim Diyora Usmonova oilasi – turmush o‘rtog‘i Botir Rahimov va farzandlari bilan Toshkentga qaytib keldi. U joriy yilning 3 oktyabr kuni “Tashkent city” Kongress xolida o‘tkazilgan “Mendirman Jaloliddin” seriali taqdimot marosimida ko‘rinish berdi. 

Diyora Usmonova marosimda O‘zbekiston Respublikasi Prezidenti Shavkat Mirziyoyevning qizlari Saida va Shahnoza Mirziyoyevalar bilan bir stolda o‘tirdi. 

Diyora Usmonova turmush o‘rtog‘i bilan 2016 yildan buyon mohojirotda qolayotgan edi. U MDHda “Botir alyuminiy” nomi bilan tanilgan Botir Rahimov bilan turmush qurgach, oila mamlakatni tark etdi. Ular bugungacha Moskva va Istanbul shaharlarida istiqomat qildi. 

Diyora Usmonova o‘zbekistonlik milliarder Alisher Usmonovning sobiq kelini. Uning Bobur Usmonov bilan turmushidan bir nafar qizi bor. 

Botir Rahimov va Diyora Usmonova 2017 yilning iyul oyida o‘g‘il farzandli bo‘lishgandi. Unga Ikromjon ismi qo‘yilgan. 

Diyora Usmonova bir necha yil avval “Bibiona Couture” bolalar liboslari brendiga asos solgan. 

Ma’lumot o‘rnida, Diyora Usmonova mamlakat birinchi xonimi Ziroat Mirziyoyevaning jiyani.