Delimxonov tirik va hatto yaralanmagan – Ramzan Qodirov 

Checheniston rahbari Ramzan Qodirov o‘zining yaqin hamkori, Rossiya Davlat Dumasi deputati hamda Rosgvardiyaning chechen bo‘linmasi boshlig‘i Adam Delimxonovning yaralangani haqidagi xabarlarni rad etdi. Bu haqda u o‘zining Telegram-kanalida ma’lum qildi. 

Qodirovning aytishicha, Delimxonovning halok bo‘lgani haqidagi xabarlar “xayoliy uydirma” bo‘lib, deputat hozirda tirik va hatto jarohatlanmagan ham. 

"Xavotirga tushgan barchaga rahmat! Adam Sultonovich tirik, sog‘lom va hatto yaralanmagan. Men bu soxta ma’lumot sizdirilishi ekanini boshidanoq bilardim. Ammo hammaga, birinchi navbatda ukrainaliklarga ularning ommaviy axborot vositalari saviyasi qay darajada tushib ketganini ko‘rsatib qo‘yishga qaror qildim”, deb yozadi u. 

Qodirov, shuningdek, 200 nafar chechen jangchisi halok bo‘lgani haqidagi xabarlar ham yolg‘on ekanini ma’lum qilgan. Bundan tashqari, o‘zining postiga Delimxonovning Grozniy shahridagi yig‘ilishdan olingan suratini ham ilova qilgan. 

“Aziz birodarlarim va men birgalikda ishlashni davom ettiramiz”, deya qo‘shimcha qiladi Qodirov. 

Uning so‘zlariga ko‘ra, “Axmat” bo‘linmalari hozirda Belgorod viloyatida Rossiya-Ukraina chegarasini mustahkamlash bilan band. 

Ma’lumot uchun, qo‘mondon Adam Delimxonov Rossiya milliy gvardiyasining chechen bo‘linmasini boshqaradi va ayni paytda Rossiya parlamenti deputati hisoblanadi. U Chechenistonda Qodirovning o‘zidan keyin ikkinchi martabali amaldor sifatida ko‘riladi.

Sobiq chechen separatisti, Checheniston hozirgi rahbariyatining katta qismi bilan birga Moskva tomoniga o‘tgan Delimxonov Rossiyaning Ukrainadagi harbiy kampaniyasida muhim rol o‘ynagan va mojaroning dastlabki kunlarida Mariupoldagi chechen kuchlariga qo‘mondonlik qilgan.

Eslatib o‘tamiz, avvalroq Ukraina OAVlari Delimxonovning Zaparojedagi janglardan birida halok bo‘lgani haqidagi xabarlarni tarqatgandi. Rossiya matbuotida esa bu xabarni birinchi bo‘lib “Zvezda”, nashri berdi. Shunga qaramay, mazkur xabar uch marta tahrirlandi.