Davlat sirlaridan voqif amaldorlarning Rossiyadan chiqib ketishi cheklanadi 

Bugun, 19 iyul kuni Rossiya Davlat Dumasining yalpi majlisida davlat sirlariga kirishni cheklash to‘g‘risidagi qonun loyihasi uchinchi o‘qishda qabul qilindi. Bu haqda TACC xabar berdi. 

Yangi qonun alohida muhim yoki o‘ta maxfiy ma’lumotlarga kirish huquqiga ega bo‘lgan shaxslarning mamlakatdan chiqib ketish huquqini cheklashni nazarda tutadi. Hujjat mart oyida Dumaning Xavfsizlik va korrupsiyaga qarshi kurash qo‘mitasi raisi Vasiliy Piskaryov boshchiligidagi deputatlar guruhi tomonidan ko‘rib chiqish uchun taqdim etilgan. 

Shuningdek, “Davlat sirlari to‘g‘risida”gi va “Rossiya Federatsiyasidan chiqish va Rossiya Federatsiyasiga kirish tartibi to‘g‘risida”gi qonunlarga o‘zgartirishlar kiritish taklif etilmoqda.

Bunga ko‘ra, mansabdor shaxsga yoki fuqaroga davlat sirlari bilan tanishishni rad etish uchun uning yaqin qarindoshlari chet elda yashashi, shuningdek, o‘zi va qarindoshlarining chet el fuqaroligiga egaligi, chet elda doimiy yashash uchun ruxsatnomasi yoki huquqini tasdiqlovchi boshqa hujjatlarning mavjudligi asos bo‘ladi. 

Qonunga ko‘ra, Rossiya Federatsiyasi fuqarosining chet elga chiqish huquqi, agar u alohida ahamiyatga ega bo‘lgan yoki o‘ta maxfiy ma’lumotlardan xabardor bo‘lsa, vaqtincha cheklanishi mumkin. Hujjatda ta’til huquqini cheklash muddati bunday ma’lumotlar bilan oxirgi marta tanishgan kundan boshlab besh yildan oshmasligi keltirilgan.

Shuningdek, qonun loyihasida bir qator fuqarolarning Rossiyadan chiqib ketishi uchun Federal xavfsizlik xizmati va Tashqi razvedka xizmatini oldindan xabardor qilish talab qilinishi belgilangan. Aytish joizki, bu yerda gap davlat sirlariga kirishni ta’minlaydigan lavozimlarni egallagan shaxslar, Davlat Dumasi deputatlari, senatorlar, mintaqaviy parlamentlar deputatlari, munitsipalitet rahbarlari, shuningdek, alohida ahamiyatga ega yoki o‘ta maxfiy ma’lumotlardan xabardor bo‘lgan sudyalar va advokatlar haqida bormoqda.