Meksikadagi “Jon” to‘foni 22 kishining hayotiga zomin bo‘ldi

Meksikaning janubi-g‘arbiy qismida bir haftadan beri Tinch okeani sohillarida davom etayotgan “Jon” to‘foni oqibatida 22 kishi halok bo‘ldi. Bu haqda “The Guardian” xabar berdi.

Suv ostida qolgan uylardan aholi evakuatsiya qilinmoqda. Meksikaning eng qashshoq shtatlaridan biri bo‘lgan Gerreroda 18 kishi halok bo‘lgan. Ko‘chkilar ko‘pchilik uylarni vayron qilgan. Janubda mahalliy ommaviy axborot vositalari Oaxakada uchta o‘lim haqida xabar bergan bo‘lsa, shimolda Michoakan shtatida bir bola daryoda halok bo‘lgan.

“Jon” Gerreroga tushishdan oldin bo‘ron ancha kuchaygan. Hafta davomida to‘fon qirg‘oq bo‘ylab sirg‘alib, kuchli yomg‘ir va suv toshqinini keltirgan.

Suv bosgan hududlarni qayiq va surfing sporti taxtalari bilan evakuatsiya qilayotgan aholi hukumatga yordam so‘rab murojaat qilgan. Chunki 2023 yildagi dahshatli bo‘rondan o‘zini tiklayotgan shahar bir yildan kamroq vaqt ichida ikkinchi falokatga duch keldi.

O‘tgan yilning oktyabr oyida “Otis” to‘foni Akapulkoga 5-toifali bo‘ron sifatida zarba berib, qirg‘oq yaqinida tezda kuchayib, 50 dan ortiq odamning hayotiga zomin bo‘ldi va milliardlab dollar zarar keltirdi. Ammo “Jon” to‘foni paytida yog‘adigan yog‘ingarchilik miqdori “Otis” to‘fonidan deyarli uch baravar ko‘p edi.

Meteorologlarning ta’kidlashicha, okean haroratining oshishi dovullarning shiddatini kuchaytirmoqda, bu esa ular tezroq kuchayishiga imkon beradi va qirg‘oq bo‘yidagi jamoalarga ularning ta’siriga tayyorgarlik ko‘rish uchun vaqt topilmay qolishi mumkin.

Eslatib o‘tamiz, avvalroq Xitoyning Xaynan orol-provinsiyasiga (Janubiy Xitoy) “Yagi” to‘foni kelib urilishi oqibatida kamida 2 kishi halok bo‘ldi, 92 kishi turli darajada jarohat oldi. So‘ngra “Yagi” to‘foni Vetnamga ham yetib bordi. 20 dan ortiq qurbon bo‘ldi.