ChatGPT’ning yangi versiyasi taqdim qilindi. U odam kabi fikrlay oladi

OpenAI yangi ChatGPT o1 til modelini taqdim etdi, u insonning fikrlash jarayoniga taqlid qilish, murakkab muammolarni oddiyroq bosqichlarga ajratish, turli yondashuvlarni tahlil qilish va xatolarni tuzatish orqali fikrlash va mantiqiy muammolarni hal qilishga qodir. Bu haqda “3DNews” xabar berdi.

Nashrga ko‘ra, o1 modeli turli testlar va musobaqalarda ajoyib natijalarni qayd etgan. U dasturlash bo‘yicha o1 2024 yilgi informatika bo‘yicha xalqaro olimpiadada 49-o‘rinni egallagan va Codeforces platformasidagi raqobatchilarning 89 foizini ortda qoldirgan. Matematika olimpiadasining saralash bosqichida esa Qo‘shma Shtatlardagi eng yaxshi 500 o‘quvchi qatoriga kirgan. Bundan tashqari, ushbu model tabiiy fanlar – kimyo, fizika va biologiya bo‘yicha bilimlarni baholovchi testda fan doktorlari va nomzodlarini ortda qoldirgan. Ishlab chiquvchilarning ta’kidlashicha, bu model har qanday fan nomzodidan ustunligini anglatmaydi, balki muammolarni yuqori malakali mutaxassislar darajasida hal qilish qobiliyatini namoyish etadi.

OpenAI ma’lumotlariga ko‘ra, o1 modeli muammolarni yechish testlarida oldingi modellardan ustun kelgan. o1 mantiqiy fikrlash bilan bog‘liq vazifalarda GPT-4o dan sezilarli darajada ustun bo‘lgan. U testlarda o‘rtacha 83% muammolarni samarali hal qilgan, GPT-4o’da esa bu ko‘rsatkich atigi 13%.

Bundan tashqari, o1 GPT-4o bilan solishtirganda gallyutsinatsiyalarga sezilarli darajada kam sezgir, ammo uni yuklash sekinroq va qimmatroq. U ensiklopedik bilimlarda GPT-4o’dan past va veb-sahifalar, fayllar va rasmlar bilan ishlay olmaydi. Model, shuningdek, ma’lumotlarni manipulyatsiya qilishi mumkin va yechimni natijaga moslashtira oladi.

Modelning muvaffaqiyati “fikr zanjiri” deb nomlangan yangi o‘rganish algoritmi bilan bog‘liq bo‘lib, u modelga xatolarni tan olish va tuzatish, murakkab bosqichlarni oddiyroqlarga ajratish va turli yondashuvlarni sinab ko‘rish orqali o‘z natijalarini yaxshilash imkonini beradi.

Qayd etilishicha, OpenAI ChatGPT’da va API orqali ishlab chiquvchilar uchun foydalanish mumkin bo‘lgan o1-preview modelining dastlabki versiyasini chiqargan. o1-preview’dan foydalanish narxi 1 million, kirish tokeni uchun 15 dollar va 1 million chiqish tokeni uchun 60 dollar, GPT-4o esa mos ravishda 5 va 15 dollarni tashkil etadi.