Bo‘stonliqda Qizil kitobga kiritilgan ayiq o‘ldirildi

Toshkent viloyati Bo‘stonliq tumanida o‘tkazilgan reyd tadbirlarida Tyan-Shan qo‘ng‘ir ayig‘i o‘ldirilgani ma’lum bo‘ldi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.

Ma’lum qilinishicha, Toshkent viloyati Ekologiya boshqarmasi tomonidan Bo‘stonliq tumani Burchmulla davlat o‘rmon xo‘jaligiga qarashli “Axsarsoy” hududida nazorat reyd tadbirlari olib borilgan.

Reyd davomida hududda hayvon terisi topilgan. Ashyoviy dalil Fanlar akademiyasi Zoologiya instituti tomonidan o‘rganilganda Tyan-Shan qo‘ng‘ir ayig‘iga tegishli ekani ma’lum bo‘lgan. Shuningdek, o‘rganish davomida ayiq noma’lum shaxslar tomonidan qo‘lbola sirtmoq yordamida o‘ldirilgani, terisi qoldirilib, boshqa qismlari olib ketilgani aniqlangan. 

Holat yuzasidan to‘plangan ma’lumotlar huquqbuzarlarning shaxsiga aniqlik kiritish maqsadida viloyat IIBBga yuborilgan.

Ma’lumot uchun, qo‘ng‘ir ayiq zaif, keng, biroq mozaik tarqalgan kenja tur sifatida O‘zbekiston Qizil kitobiga va CITESning I ilovasiga kiritilgan. Ovlash taqiqlangan hayvonlar turiga kiradi.

Eslatib o‘tamiz, 2023 yilning 5 aprel kuni Qashqadaryoning Chiroqchi tumanida aholi yashash hududiga borib qolgan Qizil kitobga kiritilgan qo‘ng‘ir ayiq o‘sha kuni tunda otib o‘ldirilgandi. Ayiq jarlikdan tepaga chiqishga uringan paytda Chiroqchi tumani IIB boshlig‘i atrofga yig‘ilgan aholi xavfsizligini ta’minlash maqsadida ovchiga ayiqqa o‘q uzish bo‘yicha ko‘rsatma bergandi. Oqibatda ayiqning joni uzilgandi.