Buxoroda teplovoz yuk mashinasi bilan to‘qnashib ketdi

Ijtimoiy tarmoqlarda Buxoroda teplovoz yuk mashinasi bilan to‘qnashgani aks etgan video tarqaldi. Viloyat Ichki ishlar boshqarmasi holat yuzasidan ma’lumot berdi.

Qayd etilishicha, voqea viloyatning Kogon tumanidan o‘tuvchi qo‘riqlanmaydigan temir yo‘l kesishmasida kecha, 6 iyun kuni soat 16:10 larda sodir bo‘lgan. Harakatlanib ketayotgan poyezd teplovozi Buxoro tumani Zarmanoq mahallasida yashovchi B.L. boshqaruvidagi “Chakman” rusumli yuk mashinasi bilan to‘qnashgan. 

Hodisa oqibatida tan jarohati olganlar yo‘qligi, faqat transport vositalariga shikast yetgani ma’lum qilingan. 

“Hozirgi vaqtda holat yuzasidan Kogon tumani IIB tomonidan tergovga qadar tekshiruv harakatlari olib borilmoqda”, deyiladi xabarda. 

Eslatib o‘tamiz, avvalroq Toshkentda elektrobus ikkita avtomobil bilan to‘qnashib ketgandi. Shuningdek, kecha, 6 iyun kuni Toshkentda yana bir holatda eketrobus yengil avtomobil bilan to‘qnashishi oqibatida bir kishi halok bo‘lgandi.