Buxoro hokimiga yangi o‘rinbosar tayinlandi

Botir Ilhomovich Ahmedov Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari etib tayinlandi. Bu haqda viloyat hokimligi axborot xizmati xabar berdi.

Bunga qadar u O‘zbekiston Respublikasi Iqtisodiyot va moliya vazirligi loyihalar ofisi boshlig‘ining o‘rinbosari lavozimida ishlab kelayotgan edi.

Ma’lumot o‘rnida, Botir Ahmedov 1982 yil 12 iyun kuni Buxoro viloyati Vobkent tumanida tug‘ilgan. 2004 yilda Jahon iqtisodiyoti va diplomatiya universiteti, 2007 yilda Toshkent davlat iqtisodiyot universiteti (magistratura)ni tugatgan.

Eslatib o‘tamiz, viloyat hokimining avvalgi o‘rinbosari Jamshid Yunusovich Tursunov Transport vazirligi huzuridagi avtomobil yo‘llari qo‘mitasi raisi vazifasiga tayinlangan edi. U joriy yilning yanvaridan iyul oyiga qadar Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari bo‘lib ishlagan.