Blinken Isroilga bordi (video)

AQSH Davlat kotibi Entoni Blinken Isroilga yetib bordi. Bu haqda “Reuters” xabar berdi.

Aytilishicha, mazkur tashrif Vashingtonning Isroil bilan birdamligini namoyish etish uchun mo‘ljallangan Yaqin Sharq safarining bir qismidir. Blinken Isroilga safari davomida mamlakat Bosh vaziri, Prezidenti, shuningdek, boshqa yuqori martabali amaldorlari bilan uchrashmoqchi. 

"Ushbu og‘ir kunlarda ajoyib ish olib borayotgan elchixonamiz xodimlari bilan uchrashishni intiqlik bilan kutaman. Biz Isroil o‘zini himoya qilishi va o‘z xalqi xavfsizligini ta’minlashi uchun zarur barcha yordamni beramiz”, degan AQSH Davlat kotibi.

Uning so‘zlariga ko‘ra, Isroil so‘ragan harbiy yordam allaqachon jo‘natilgan.

Uchrashuvlar davomida HAMAS tomonidan o‘g‘irlab ketilgan va garovga olinganlarni ozod qilish va Isroil qo‘shinlarining quruqlikdan bostirib kirishi ehtimolini kutgan holda tinch aholini G‘azo sektoridan xavfsiz olib chiqish masalalari muhokama qilinadi.

Shuingdek, Blinken ertaga, 13 oktyabr kuni Falastin Prezidenti Mahmud Abbos bilan uchrashishni rejalashtirgan.

Eslatib o‘tamiz, oldinroq Ukraina Prezidenti Vladimir Zelenskiy ham Isroilga tashrif buyurishni rejalashtirayotgani aytilgandi.