Biz Falastin va Isroilni himoya qiladigan yechimni xohlaymiz – Mahmud Abbos

Falastinliklar o‘tgan deyarli bir yil davomida zamonning eng vahshiy jinoyatlaridan biriga duchor bo‘ldi. Bu haqda kecha, 26 sentyabr kuni Falastin Prezidenti Mahmud Abbos AQSHning Nyu-York shahrida o‘tayotgan BMTning 79-sessiyasi minbarida so‘z ochdi. 

“Bu Isroil tomonidan sodir etilayotgan to‘liq ko‘lamli urush – genotsid jinoyatidir. Ushbu jinoyat faqatgina G‘azoning o‘zida 40 mingdan ortiq insonning o‘limiga olib keldi va minglab aholi vayronalar ostida qoldi. Bugungi kungacha 100,000 dan ortiq odam jarohatlandi” , dedi u.

U, shuningdek, falastinlik oilalar qirib tashlanganini, ularning oilaviy nomlari esa butunlay yo‘q qilinganini qayd etdi. Bundan tashqari, hujumlar davomida kasalliklar tarqalib, toza suv va muhim dorilar yetishmayotganini, ikki milliondan ortiq falastinliklar o‘z uylarini tashlab ketishga majbur bo‘lganini ta’kidladi.

Prezident Abbos Isroil Bosh vazirining iyul oyida AQSH Kongressida G‘azoda Isroil kuchlari begunoh fuqarolarni o‘ldirmaganini da’vo qilgan yolg‘onlariga javob berish uchun so‘zlamayotganini ta’kidladi.

“Men sizdan so‘rayman: unda kim 40,000 qurbonning 15,000 dan ortig‘i bo‘lgan bolalarni va shuncha ayollar hamda qariyalarni o‘ldirdi? Va hozir kim ularni o‘ldirishda davom etmoqda?” dedi u.

Abbos o‘z nutqida “G‘azodagi urush tugaganidan keyin nima qilish kerak” degan 12 bandlik taklifini ham bayon qildi.

Unda boshqa masalalar bilan bir qatorda, G‘azoda keng qamrovli va doimiy sulh tuzish, G‘arbiy Sohil va Sharqiy Quddusdagi harbiy va ko‘chmanchi zo‘ravonliklarni to‘xtatish, Isroilning G‘azodan hech qanday tampon hududlarsiz yoki anneksiyalarsiz to‘liq chiqib ketishi talab qilinadi.

Falastin Prezidenti, shuningdek, G‘azoga muntazam va yetarli darajada gumanitar yordam yetkazish, bosib olingan Falastin hududlaridagi majburiy ko‘chirishni to‘xtatish va Birlashgan Millatlar Tashkilotining Falastin qochqinlariga yordam va ishlar agentligi (UNRWA) va boshqa gumanitar tashkilotlarni qo‘llab-quvvatlashning kuchaytirilishi zarurligini ta’kidladi.

Bundan tashqari, u bosib olingan hududlarda falastinliklarga xalqaro himoya kerakligini va Falastin davlati G‘azoda mas’uliyatni o‘z zimmasiga olib, hududda yurisdiksiyani amalga oshirishi, shu jumladan chegaradagi nazorat punktlarini boshqarishi kerakligini ma’lum qildi.

“Bu bizning taklifimiz, siz uni qabul qilishingiz, tuzatishingiz yoki o‘zgartirishingiz mumkin, biz bularning barchasiga tayyormiz”, dedi u.

Abbosga ko‘ra, Falastin Isroil davlatini tan oladi, lekin Isroil Falastinni tan olmaydi.

“Biz har ikki davlatni – Falastin va Isroilni himoya qiladigan yechimni xohlaymiz, shunda ular tinchlik, barqarorlik va xavfsizlikda birga yashashlari mumkin bo‘ladi”, deydi u.

Eslatib o‘tamiz, avvalroq Turkiya Respublikasi Prezidenti Rajab Toyib Erdo‘g‘an BMTning 79-sessiyasi minbarida G‘azo sektoridagi vaziyat haqida so‘z ochib, u yerni dunyoning eng katta ayollar va bolalar qabristoni deb atagan edi.