Biz bir oiladek edik, bu sovrin yutishning yagona yo‘li – Luka Modrich

“Real Madrid”ning xorvatiyalik yarim himoyachisi Luka Modrich jamoa nima uchun mavsumni muvaffaqiyatli o‘tkazgani haqida fikr bildirdi. 

“Joriy mavsumda jarohatlar bo‘yicha ko‘p muammolarga duch keldik, lekin biz doimo bir-birimizga yordam berardik, bir oiladek bo‘ldik. Bu sovrinlarni yutishning yagona yo‘li. Muxlislarimizga qo‘llab-quvvatlaganliklari uchun minnatdorlik bildirmoqchiman – ular biz uchun qanchalik muhimligini bilishmasa ham kerak”, deydi Modrich.

Joriy mavsumda Luka Modrich barcha musobaqalarda 45 ta o‘yinda ishtirok etib, 2 ta gol urdi va 8 ta golli uzatmani amalga oshirdi. “Transfermarkt” portalida berilgan ma’lumotlarga ko‘ra, futbolchining bozor qiymati 8 million yevroni tashkil qiladi.

Ispaniya chempionati yakuniga ko‘ra, “Real Madrid” 36 marta milliy chempionlik unvonini qo‘lga kiritdi. “Qaymoqranglilar” 38 turda 95 ochko jamg‘ardi. Shuningdek, “Real” asosiy Yevropa Chempionlar ligasi finalida Dortmundning “Borussiya” jamoasini mag‘lub etib, 15 marta turnirda g‘olib chiqdi (2:0).