Bivol va Beterbiyev o‘rtasidagi revansh jangi sanasi aniq bo‘ldi

22 fevral kuni Saudiya Arabistonida bo‘lib o‘tadigan “Riyadh Season” yirik boks festivalida ikki rossiyalik – yarim og‘ir vaznda mutlaq jahon chempioni Artur Beterbiyev va xuddi shu vaznda sobiq jahon chempioni Dmitriy Bivol o‘rtasida boks bo‘yicha revansh jangi bo‘lib o‘tishi mumkin. Bu haqda Saudiya Arabistoni Ko‘ngilocharliklar bosh boshqarmasi raisi Turki Al ash-Shayx ma’lum qildi.

“Riyadh Season” katta musobaqaga tayyorgarlik ko‘rmoqda, jumladan Artur Beterbiyev mutlaq chempionligini Dmitriy Bivolga qarshi revansh jangida himoya qiladi”, deyiladi manba xabarida.

Bivol va Beterbiyev o‘rtasidagi birinchi jang 2024 yil oktyabr oyida bo‘lib o‘tgan, o‘shanda Beterbiyev hakamlarning ovozi bilan g‘alaba qozonib, yarim og‘ir vazn toifasi tarixida oltita chempionlik unvonining birinchi sohibiga aylangandi. 

Ma’lumot uchun, 39 yoshli Beterbiyev profboksda 21 ta jang o‘tkazib, barcha jangda g‘alaba qozongan va janglarining 20 tasida raqiblarini nokautga uchratgan. 33 yoshli Bivol esa 24 ta jang o‘tkazib, 23 tasida g‘alaba qozongan.