Bitta maymun 22 mln kishini “svet”siz qoldirdi

Kecha, 9 fevral kuni soat 11:00 larda bitta maymun 22 mln kishi istiqomat qiladigan butun Shri-Lankani elektrsiz qoldirdi. Energetika vaziri Kumara Jayakodi orolda elektr o‘chganining sababini shunday tushuntirdi.

“Tarmog‘imizdagi transformatorga maymun tegdi, bu esa tizimda nomutanosiblikni keltirib chiqardi”, dedi vazir.

Shri-Lanka poytaxti Kolombo janubidagi podstansiyada maymun uchun fojiali voqea yuz berdi. Shundan so‘ng, elektr ta’minoti tibbiyot muassasalari va suv tozalash inshootlaridan boshlab, ko‘p soatlar davomida bosqichma-bosqich tiklanishi kerak edi.

Shri-Lankadagi ijtimoiy tarmoq foydalanuvchilari voqea yuzasidan rasmiylarga qarata ko‘plab hazillar bilan chiqishdi.

“Faqat Shri-Lankadagi podstansiyada bir guruh maymunlar o‘rtasidagi mushtlashuv butun orolda yorug‘likni keltirib chiqarishi mumkin”, deb yozdi mahalliy “Daily Mirror” gazetasi bosh muharriri Jamila Husayn.

Gazeta bugun, 10 fevral kuni chop etilgan maqolada mutaxassislar yillar davomida ketma-ket hukumatlarga mamlakat tarmoqlarini modernizatsiya qilish zarurligini, aks holda o‘chirishlar bo‘lishini aytib kelganini eslatdi.

“Mamlakat elektr tarmog‘i shunday holatdaki, muammo faqat elektr uzatish liniyalaridan birida bo‘lsa ham, butun mamlakat bo‘ylab uzilishlar bo‘lishini kutishimiz kerak”, deya nomi oshkor etilmagan muhandisdan iqtibos keltiradi gazeta.

Mohimbegim Ma’rufaliyeva