“Bepul non tarqatardi”. Olmaotada o‘zbekistonlik novvoy o‘ldirildi (video)

Joriy yilning 26 avgust kuni Qozog‘istonning Olmaota viloyati Oqtosh qishlog‘idagi mojaro paytida O‘zbekiston fuqarosi pichoqlab o‘ldirildi. Marhum 35 yoshda bo‘lgan, oxirgi besh yil davomida u novvoyxonada ishlab, non sotgan. Bu haqda “Ulysmedia” xabar berdi.

Mahalliy aholining so‘zlariga ko‘ra, erkak qishloqda o‘zini juda yaxshi tomondan ko‘rsatgan va hech kim bilan mojaroga bormagan. U tez-tez odamlarga yordam bergan, juma kunlari esa bepul non tarqatgan.

Dastlabki ma’lumotlarga ko‘ra, marhum va 56 yoshli erkak o‘rtasida og‘zaki nizo kelib chiqib, u mushtlashuvga aylanib ketgan. Tergov talqiniga ko‘ra, mojaro paytida gumonlanuvchi pichoq chiqarib, erkakka o‘limga sabab bo‘luvchi jarohatlar yetkazgan.

Olmaota viloyati politsiyasining ma’lum qilishicha, qotillik fakti bo‘yicha jinoyat ishi qo‘zg‘atilgan. Tezkor-qidiruv tadbirlari davomida 56 yoshli gumonlanuvchi aniqlanib, qo‘lga olingan. Hozirda u vaqtincha saqlash hibsxonasida. Politsiya departamenti ma’lumotlariga ko‘ra, erkak o‘z aybiga iqror bo‘lgan.

Eslatib o‘tamiz, avvalroq Qozog‘iston Respublikasining Qizilo‘rda viloyatida ro‘y bergan yo‘l-transport hodisasi oqibatida 3 o‘zbekistonlik halok bo‘lgan edi.