Baydenning partiyasi saylovchilarni jalb qilishda Teylor Sviftdan foydalanmoqchi – “Politico”

Amerika Qo‘shma Shtatlarining Demokratlar partiyasi a’zolari amerikalik mashhur qo‘shiqchi Teylor Sviftning chiqishlaridan Florida shtatida saylovoldi tashviqoti platformasi sifatida foydalanish niyatida. Bu haqda “Politico” nashri xabar berdi.

Qayd etilishicha, demokratlar xonandaning Mayamidagi konsertlarida saylovchilarni ro‘yxatga olish tadbirlarini o‘tkazishni, shuningdek, Sviftning aprel oyida kutilayotgan yangi albomi chiqishi sharafiga guruh tinglovlari va karaoke kechalari tashkil etishni rejalashtirmoqda. Partiya vakillari Gremmi mukofoti sovrindori bilan bevosita bog‘lanish niyatida. Shunda uning Mayamidagi konsertlaridan demokratlar dasturidan o‘rin olgan ijtimoiy masalalarni muhokama qilishda foydalanish mumkin.

“Politico”ning yozishicha, partiyaning bunday harakatlari respublikachilarni qo‘llab-quvvatlashiga moyil bo‘lgan shtatdagi zaiflashgan pozitsiyasini namoyish etadi. Ikkinchidan, Florida qonun chiqaruvchi organida republikachilar ko‘pchilikka ega. Respublikachilar partiyasidan nomzod Donald Tramp ham 2016 va 2020 yillardagi prezidentlik saylovlarida xuddi shu shtatda g‘alaba qozongandi.

Ma’lumot uchun, AQSHda navbatdagi prezidentlik saylovlari joriy yilning noyabr oyida bo‘lib o‘tadi.

Eslatib o‘tamiz, oldinroq AQSH Prezidenti Jo Baydenning yordamchilari bo‘lajak prezidentlik saylovlarida ham mashhur Teylor Sviftning qo‘llab-quvvatlashidan umidvor ekani aytilgandi.