Bayden Zelenskiyga harbiy yordam va’da qildi

AQSH Prezidenti Jo Bayden kecha, 22 aprel kuni Ukraina Prezidenti Vladimir Zelenskiy bilan bo‘lib o‘tgan telefon suhbatida milliy xavfsizlikni ta’minlash uchun qo‘shimcha mablag‘lar ajratish to‘g‘risidagi qonun loyihasi Senat tomonidan qabul qilinishi bilanoq uning ma’muriyati zudlik bilan Ukrainaning xavfsizlik va havo mudofaasi ehtiyojlarini qondirish uchun yangi muhim xavfsizlik yordam paketlarini taqdim etishini aytdi. Bu haqda Oq uy matbuot xizmati xabar berdi.

Qayd etish joizki, 20 aprel kuni Vakillar palatasi ikki partiyaning keng qo‘llab-quvvatlashi bilan Ukraina, Isroil va Tayvanga xavfsizlik sohasida yordam ko‘rsatadigan 95 milliard dollarlik qonunchilik paketini qabul qildi. Shungacha Ukrainaga yordam bir necha oyga kechiktirilgandi. Prezident Jo Baydendan tortib Senatdagi respublikachi Mitch Makkonnelgacha bo‘lgan AQSH yetakchilari Vakillar palatasi spikeri Mayk Jonsonni qonun loyihasini ovozga qo‘yishga chaqirdi. Qonun loyihasi endi demokratlar ko‘pchilikni tashkil etuvchi Senatga yuboriladi, u ikki oydan ko‘proq vaqt oldin shunga o‘xshash chorani ma’qullagandi.

Bugun, 23 aprel kuni Senat qonun loyihasini ko‘rib chiqishni boshlashi rejalashtirilgan. Dastlabki ovoz berish bugun tushdan keyin bo‘lib o‘tadi. Kelgusi hafta qonun loyihasining yakuniy qabul qilinishi kutilmoqda, shundan so‘ng Bayden uni imzolashi mumkin.

Prezident Bayden AQSHning iqtisodiy yordami moliyaviy barqarorlikni saqlashga, Rossiya hujumlaridan keyin muhim infratuzilmani tiklashga va Ukraina Yevro-Atlantika integratsiyasi sari intilayotgan islohotlarni qo‘llab-quvvatlashiga urg‘u berdi.

O‘z navbatida, Ukraina Prezidenti amerikalik mavqedoshiga minnatdorlik bildirib, Kiyev ATACMS raketa majmualarini olishini aytdi. Zelenskiy o‘zining Telegram-kanalida Amerika Prezidenti bilan suhbatda Vakillar palatasi spikeri Mayk Jonson va Vakillar palatasi ozchiliklar yetakchisi Hakim Jeffrisning Ukrainaga yirik harbiy yordam to‘g‘risidagi qonun loyihasining qabul qilinishini ta’minlashdagi rolini qayd etganini aytdi.

Keyinchalik, kechki videomurojaatida Zelenskiy hali Senat tomonidan ma’qullanmagan va Jo Bayden tomonidan imzolanishi kutilayotgan qonun uzoq masofali harbiy-taktik raketa tizimlarini Ukrainaga o‘tkazishni ko‘zda tutayotganini qo‘shimcha qildi.

"Ukraina uchun ATACMS kelishuvi barcha tafsilotlarni o‘z ichiga oladi. Rahmat, janob Prezident, rahmat, Kongress, rahmat, Amerika ", deydi u.

21 aprel kuni Senat razvedka qo‘mitasi raisi Mark Uorner ATACMS kelasi haftada Ukrainaga yuboriladigan qurollar qatorida ekanini aytgan. O‘tgan yilning oktyabr oyida Oq uy Kiyevga 165 kilometrgacha bo‘lgan masofadagi nishonlarga zarba bera oladigan ATACMS tizimlarini taqdim etganini tasdiqlagan edi.

Shuningdek, Zelenskiy Baydenga “Rossiya havo terrori bilan minglab raketalar, dronlar va bombalar hujumi” haqida gapirib berdi va Ukrainaning ikkinchi yirik shahri Xarkovdagi teleminoraga ularning suhbatidan bir necha daqiqa oldin sodir bo‘lgan zarbani qayd etdi. Ukraina Prezidenti Kiyevga tashrif buyurgan kongress delegatsiyasiga Ukrainaning eng dolzarb mudofaa ehtiyojlari, xususan, havo mudofaasini kuchaytirish haqida ma’lumot yetkazganini yozgan.