Bayden rekord darajadagi mudofaa byudjetini imzoladi

AQSH Prezidenti Jo Bayden mamlakatning 2024-moliya yili uchun rekord miqdorda – 886,3 milliard dollarlik mudofaa byudjetini imzoladi. Bu haqda kecha, 22 dekabr kuni Oq uy ma’lum qildi.

1 oktyabrda boshlangan 2024-moliya yili uchun byudjet loyihasi AQSH Kongressining har ikki palatasi tomonidan ma’qullangan.

Hujjat Mudofaa, Energetika vazirliklari, AQSH Davlat departamenti, shuningdek, razvedka xizmatlari va milliy xavfsizlik dasturlari faoliyatini moliyalashtirishni belgilaydi. 

“Qonun kelajakda mojarolarning oldini olish, harbiy kuchlarni yaratishimiz uchun zarur bo‘lgan muhim organlarni ta’minlaydi”, deb ta’kidladi Oq uy rahbari.

Bayden tasdiqlagan hujjatga ko‘ra, amerikalik harbiy xizmatchilarning rasmiy maoshlari 5,2 foizga oshadi. Bundan tashqari, mudofaa byudjetida aytilishicha, ba’zi Xitoy akkumulyator kompaniyalari AQSH xaridlarida ishtirok eta olmaydi.

Shuningdek, Jo Bayden imzolagan byudjet Ukraina xavfsizligiga ko‘maklashish tashabbusini 2026 yil oxirigacha uzaytiradi, bu esa Kiyevga 2024 yil 30 sentyabrda yakunlanadigan joriy moliya yilida dastur uchun 300 million dollar ajratish imkonini beradi. Pul AQSHdagi arsenallardan to‘g‘ridan to‘g‘ri yetkazib berish uchun emas, balki Ukrainaga yuboriladigan qurollarni ishlab chiqarishga sarflanadi.

Eslatib o‘tamiz, Bayden ma’muriyati Ukrainani Rossiyaga qarshi mudofaa urushida qo‘llab-quvvatlash uchun ajratilgan mablag‘ deyarli tugab qolganini bir necha bor ta’kidlagan. AQSH Prezidenti Kongressdan xavfsizlik uchun 106 milliard dollar, jumladan, Ukrainaga 60 milliard dollardan ortiq yordam ajratishni ma’qullashni so‘radi, biroq kongressmenlar bu taklifni rad etdi. Pentagon AQSH Kongressi Ukrainaga qo‘shimcha mablag‘ ajratishni ma’qullamasa, uning Kiyevga yordam berish imkoniyati 30 dekabrda tugashi haqida ogohlantirdi.