Bayden keyingi haftada saylovoldi kampaniyasini davom ettirmoqchi
Olam
−
20 iyul
1969AQSH Prezidenti Jo Bayden kelasi hafta saylovoldi tashviqoti tadbirlarida ishtirok etishni davom ettirish niyatida. Bu haqda Amerika yetakchisining saylovoldi shtab-kvartirasi tarqatgan bayonotida so‘z boradi.
“Kelgusi hafta saylovoldi tashviqotiga qaytishni intiqlik bilan kutaman, bunda Donald Trampning 2025 yil loyihasidan kelib chiqadigan tahdidni yana bir bor ta’kidlab, o‘zimning yutuqlarim va Amerikaga bo‘lgan qarashlarim, demokratik tizimimizni saqlab qolish, huquq va erkinliklarimizni himoya qilish, hamma uchun imkoniyatlar yaratish haqida gapirib o‘tishim mumkin”, deyiladi hujjatda.
Bayden 17 iyul kuni koronavirus bilan kasallanganidan keyin saylovoldi kampaniyalarida ishtirok etishni to‘xtatishga majbur bo‘ldi. Oq uyga ko‘ra, Amerika yetakchisi o‘zini izolyatsiya qilgan va davlat rahbari sifatida xizmat qilishda davom etmoqda.
AQSHda prezidentlik saylovlari 5 noyabr kuni bo‘lib o‘tadi. AQSH Demokratik partiyasidan Bayden vakil bo‘lishi taxmin qilingan edi.
Uning nomzodi Illinoys shtatining Chikago shahrida 19-22 avgust kunlari bo‘lib o‘tadigan Demokratik partiyaning milliy qurultoyida tasdiqlanishi kutilmoqda.
Biroq Baydenning 27 iyun kuni respublikachi Tramp bilan saylovoldi teledebatidagi halokatli chiqishidan so‘ng, Qo‘shma Shtatlarda, shu jumladan demokratlar orasida ham, eng yuqori hukumat lavozimini saqlab qolish uchun keyingi urinishlardan voz kechishga chaqiriqlar kuchayib ketdi.
Keyingi voqealar AQSH Demokratik partiyasida Bayden o‘rniga kimnidir zudlik bilan prezidentlikka nomzod sifatida ko‘rsatish kerakmi, degan masala bo‘yicha bo‘linishning chuqurlashishiga olib keldi. Prezident keyingi dam olish kunlarida qayta saylanish uchun kurash tugaganini e’lon qilishi mumkinligiga dalillar bor. Bunday holda, AQSH Demokratik partiyasi qurultoyda tasdiqlash uchun o‘zining yangi nomzodini qidirishni boshlaydi.
Amerika ommaviy axborot vositalarida xabar qilinishicha, Tramp prezidentlikka saylansa, xususan, AQSHning bir qator konservativ tashkilotlarining ilgari Heritage Foundation tomonidan bayon etilgan va “2025 yil loyihasi” deb nomlangan takliflarini amalga oshirishga harakat qiladi.
Eslatib o‘tamiz, oldinroq Amerika yetakchisining davolovchi shifokori Kevin O’Konnor koronavirusga chalingan Jo Baydenning ahvoli so‘nggi 24 soat ichida sezilarli darajada yaxshilanganini ma’lum qilgandi.
LiveBarchasi