“Barselona”ning titul homiysi o‘zgarishi mumkin

“Barselona” klubning titul homiysi bo‘lishga intilayotgan kompaniyalar bilan muzokaralarni davom ettirmoqda. Bu haqda “Mundo Deportivo” xabar berdi.

Ma’lum qilinishicha, ikki kriptovalyuta birjalari – “Binance” va FTX bilan muzokaralar faol tarzda davom etmoqda. 

Shu bilan birga, “ko‘k-anorranglilar”ning hozirgi titul homiysi “Rakuten” bilan aloqalarni buzganicha yo‘q. “Barselona” rahbariyati bosh homiydan bonuslar bilan birga yiliga taxminan 60 million yevro olishni istaydi. Yaponiya elektron tijorat kompaniyasi esa bunday shartlarga rozi emas. Shu sabab hamkorlik bekor qilinishi kutilmoqda.

Eslatib o‘tamiz, “Barselona” Ispaniya La ligasi turnir jadvalida 16 o‘yindan so‘ng, 24 ochko jamg‘argan holda 8-o‘rinda bormoqda.

Shuningdek, 2003/04 yilgi mavsumdan beri birinchi marta UEFA Chempionlar ligasi pley-off bosqichi ishtirokchilari qatoriga kirmadi. Bu vaqt davomida klub 4 marta Chempionlar ligasi va Superkubogi hamda uch bor klublar o‘rtasidagi jahon chempionatida g‘olib chiqqan.

Ma’lumot uchun, Kataloniya klubining “Rakuten” bilan shartnomasi 2022 yilning yozida yakuniga etadi. Amaldagi shartnomaga ko‘ra, kompaniya jamoa uchun yiliga 30 million yevro to‘laydi.