Bag‘dodda vaziyat o‘nglanmoqda, Komendantlik soati bekor qilindi

Nufuzli shia imomi Muqtada as-Sadr harakati tarafdorlarining aksariyati Iroq poytaxtidagi hukumat “yashil zonasi”ni tark etdi. 

Xorijiy davlatlarning davlat idoralari va diplomatik vakolatxonalari joylashgan Bag‘dodning cho‘l hududi tasvirlari “Al Jazeera” telekanali tomonidan jonli efirda namoyish etilmoqda. Qolgan sadristlar avvalroq parlament yaqinida qurgan chodirlarni ko‘chirmoqda, deb xabar bermoqda “Al Sumaria” telekanali. 

“Al Arabiya” telekanali xavfsizlik kuchlari “yashil hudud” darvozasiga olib boruvchi avval to‘sib qo‘yilgan Al-Jumhuriya ko‘prigini ochganini xabar qildi. Bundan tashqari, Iroq armiyasining qo‘shma operatsiyalar qo‘mondonligi kecha, 29 avgust kuni Bag‘dodda to‘sib qo‘yilgan barcha yo‘llar qayta ochilganini ma’lum qildi, deb xabar bermoqda “Sky News Arabia”. 

Nufuzli shia imomi Muqtada as-Sadr o‘z tarafdorlariga 60 daqiqa ichida Bag‘dodning “yashil zonasi”dagi parlament hududini tark etishni buyurgan. 

“Bo‘layotgan voqeadan juda qayg‘udaman va jangni kim boshlaganidan qat’i nazar, Iroq xalqidan uzr so‘rayman”, degan as-Sadr. 

Shia imomi o‘z harakati tarafdorlarining zo‘ravonliklarga olib kelgan harakatlarini tanqid qildi. 

“Bu endi inqilob emas, endi men sadristlarning harakatlarini qoralayman”, deydi u. 

Tarafdorlar respublika parlamentiga tutash hududni tark etganidan so‘ng, Iroq armiyasining qo‘shma operatsiyalar qo‘mondonligi butun mamlakat bo‘ylab joriy qilingan komendantlik soatini bekor qildi. 

Eslatib o‘tamiz, kecha, 29 avgust kuni siyosatdan ketishini e’lon qilgan shia imomi Muqtado as-Sadrning  yuzlab tarafdorlari shaharning hukumat idoralari va xorijiy davlatlarning diplomatik vakolatxonalari joylashgan “yashil hududi”ni egallab, Respublika saroyini o‘rab olib, binoga kirishdi. Namoyishlar sadrchilarni quvib chiqarishga urinayotgan xavfsizlik kuchlari bilan qurolli to‘qnashuvlarga aylangan. So‘nggi ma’lumotlarga ko‘ra, shiddatli to‘qnashuvlarda halok bo‘lganlar soni 30 kishiga yetgan, 300 dan ortiq kishi jarohatlangan. Namoyishlar va to‘qnashuvlar Iroqning boshqa hududlarini ham qamrab oldi.