Ayollar o‘rtasida O‘zbekistonning eng yaxshi futbolchi va murabbiyi nomi ma’lum bo‘ldi

Bugun, 25 dekabr kuni O‘zbekiston futbol assotsiatsiyasi va Professional futbol ligasi tomonidan o‘zbek futbolining 2021 yil yakunlariga bag‘ishlangan “Uz Football Awards-2021” taqdirlash marosimi bo‘lib o‘tmoqda. 

“O‘zbekistonning eng yaxshi ayollar murabbiyi” sifatida yosh iqtidorlarni katta futbolga yetkazib berishda jonbozlik ko‘rsatib kelayotgan mutaxassis – Ilhom Hanjariyev, deb topildi. 

“Bunyodkor-W” ayollar jamoasi bilan birgalikda klublar o‘rtasidagi Osiyo chempionatida ishtirok etgan futbolchi – Dildora Nozimova “Yilning eng yaxshi ayol futbolchisi” sovrini bilan taqdirlandi.

Eslatib o‘tamiz, Ayollar futboli bo‘yicha “Oliy liganing eng yaxshi futbolchisi” va to‘purari sovrini O‘zbekiston ayollar terma jamoasi yetakchisi va “So‘g‘diyona-W” safida chempionat to‘purari Diyora Xabibullayevaga nasib etgan edi.

Shuningdek, bir necha yildan buyon OKMK (Olmaliq) U-21 jamoasi bilan sovrinli o‘rinlar uchun kurashib kelayotgan mutaxassis A’zam Sherg‘oziyev “O‘zbekistonning eng yaxshi yoshlar murabbiyi” sovrini bilan taqdirlandi. Sherg‘oziyev ushbu mavsumda jamoasi bilan tarixda ilk bor U-21 chempionati g‘olibiga aylandi.