Angliyaning ikki klubiga bosh murabbiy tayinlandi 

Angliyaning “Lester Siti” futbol klubiga 48 yoshli niderlandiyalik Rud van Nistelroy bosh murabbiy etib tayinlandi. Bu haqda futbol jurnalisti Fabritsio Romano xabar berdi.

Noyabr oyi boshida van Nistelroy Erik ten Xag iste’foga chiqqanidan keyin vaqtinchalik bosh murabbiy bo‘lib ishlagan “Manchester Yunayted”ni tark etdi. “Manchester Yunayted” Nistelroy boschiligida to‘rtta o‘yin o‘tkazib, 3 marta g‘alaba qozongan va 1 marta durang o‘ynadi. Shu bilan birga, “qizil iblislar” ikki marta “Lester” ustidan g‘alaba qozondi – Liga kubogida 5:2, Angliya chempionatida 3:0.

O‘z navbatida, angliyalik mutaxassis Frenk Lempard Chempionshipda qatnashadigan “Koventri Siti” bosh murabbiyiga aylandi. Bu haqda klub matbuot xizmati xabar berdi.

“Koventri Siti” Frenk Lempardning yangi bosh murabbiy etib tayinlanganini mamnuniyat bilan e’lon qiladi. 46 yoshli mutaxassis ikki yarim yillik shartnoma imzoladi va o‘zining ilk uchrashuvini shu shanba kuni Koventri Building Arenada "Kardiff Siti"ga qarshi o‘tkazadi. Frenkni ikki yangi murabbiy – Jo Edvards va Kris Jons qo‘llab-quvvatlaydi, ular oldin ham birga ishlagan”,  deyiladi klub bayonotida.

“Koventri Siti” Chempionship turnir jadvalida 17-o‘rinda bormoqda. Jamoa 17 uchrashuvda 17 ochko jamg‘argan.