Angliya bankining sobiq rahbari Kanada Bosh vaziri bo‘lmoqchi

Kecha, 16 yanvar kuni Angliya bankining sobiq rahbari Mark Karni o‘zi tug‘ilib o‘sgan Edmonton shahrida hukmron Liberal partiya yetakchisi lavozimida Jastin Tryudo o‘rniga Kanadaning bosh vazirligi uchun o‘z nomzodini qo‘yishini rasman e’lon qildi. Bu haqda BBC xabar berdi.

Agar u g‘alaba qozonsa, 59 yoshli Karni nafaqat partiyani boshqaradi, balki shu yil oxiridagi saylovlarga qadar Kanada Bosh vaziri bo‘ladi.

Mark Karni kanadalik va taniqli iqtisodchi. U 2008 yildan 2013 yilgacha, global moliyaviy inqirozdan keyingi dastlabki yillarda Kanada Bankining gubernatori, keyin esa 2013 yildan 2020 yilgacha Angliya Bankining rahbari bo‘lgan, bu lavozim Buyuk Britaniyaning Yevropa Ittifoqidan chiqishi paytidagi notinch yillarni qamrab olgan.

“Men ko‘plab inqirozlarni hal qilishda va ikki iqtisodiyotni saqlab qolishda ishtirok etdim. Men biznes qanday ishlashini bilaman va uni siz uchun qanday qilish kerakligini bilaman”, dedi Karni.

Karni so‘nggi bir necha oy ichida Tryudoning iqtisodiy masalalar bo‘yicha maslahatchisi bo‘lib ishlagan, ammo endi Tryudoni tanqid qila boshladi.

“Men Kanadadagi Liberal partiyaning yagona a’zosi emasman, u Bosh vazir va uning jamoasi iqtisoddan tez-tez chalg‘igan deb o‘ylaydi”, dedi u.

Kanada Liberal partiyasi rahbari lavozimiga nomzodlar 23 yanvargacha davom etadi va da’vogarlar ro‘yxati hozircha ma’lum emas, biroq siyosiy kuzatuvchilarning taxminiga ko‘ra, partiyaning bir qancha taniqli arboblari saylovda Karni bilan raqobatlashadi va eng ko‘p jiddiy da’vogar Xristya Friland bo‘lishi mumkin.

Friland Tryudoning sobiq bosh vazir o‘rinbosari va moliya vaziri bo‘lib, dekabr oyidayoq bu lavozimlarni tark etgan.

Xristya Friland onasi tomonidan ukrainalik. U universitetda Rossiya va mintaqa tarixini o‘rgangan, Ukrainada jurnalist bo‘lib ishlagan, bosh vazir o‘rinbosari va moliya vaziri sifatida Kanadaning Ukrainaga yordam ko‘rsatishida va Rossiyaga qarshi sanksiyalar qo‘yishda muhim rol o‘ynagan.

Eslatib o‘tamiz, joriy yilning 6 yanvar kuni xalqqa qilgan maxsus murojaatida Kanada Bosh vaziri Jastin Tryudo hukmron Liberal partiya raisi lavozimini tark etishini, ammo Bosh vazirlikdan partiyaning yangi rahbari saylangandan keyin iste’foga chiqishini ma’lum qilgandi. Shuningdek, Tryudo Kanada general-gubernatori Meri Saymondan parlament faoliyatini 24 martgacha to‘xtatishni so‘ragan. Bu chora muxolif partiyalar tomonidan yanvar oxiriga rejalashtirilgan ishonchsizlik votumini o‘tkazishga to‘sqinlik qilish uchun zarur.