Alisher Usmonov dunyo boylari reytingida ko‘tarildi

Alisher Usmonov "Forbes" tomonidan e’lon qilingan dunyoning eng boy odamlari reytingida ko‘tarildi. Bu haqda nashr hisobotida ma’lum qilindi. 

Qayd etilishicha, Usmonovning boyligi 2022 yilga nisbatan 2,9 milliard dollarga oshib, 14,4 milliardga yetgan. Bu natija bilan u dunyo boylari reytingida 122-o‘rinni egallab turibdi. 

"Uning eng yirik xoldingi temir rudasi va po‘lat giganti "Metalloinvest"dir. Shuningdek, u Xiaomi, tog‘-kon sanoati va media kompaniyalarida ulushlarga ega. U o‘zining dastlabki boyligini Sovet Ittifoqida juda tanqis tovar bo‘lgan poliyetilen paketlar ishlab chiqarishdan topgan edi. Usmonov 2000 yildan 2014 yilgacha "Gazprom" davlat konglomeratining sho‘ba korxonasi "Gazprom Investxolding"ni boshqargan. Sobiq qilichboz bo‘lgan Usmonov 2022 yilgacha Xalqaro qilichbozlik federatsiyasi prezidenti bo‘lgan", deyiladi xabarda. 

Shuningdek, xabarda aytilishicha, dunyo milliarderlarining boyligi 2022 yilning mart oyiga nisbatan 500 milliard dollarga pasayib, 12,2 trillionni tashkil qilgan. Bungacha ushbu ro‘yxatni boshqarib kelgan Ilon Mask Twitter'ni sotib olganidan so‘ng Tesla aksiyalari narxining pasayishi sabab 39 milliard dollar yo‘qotgan. Mask hozirda 180 milliard dollar bilan dunyoning ikkinchi eng boy odami bo‘lib turibdi. 

Dunyoning eng boy odami maqomiga esa LVMH egasi, fransiyalik Bernar Arno sazovor bo‘lgan. Arnoning boyligi 2022 yildagi 158 milliarddan keskin ko‘payib, 211 milliard dollarga yetgan. Ma’lumot uchun, u 75 ta moda va kosmetika brendlarining LVMH imperiyasini, jumladan Louis Vuitton va Sephora'ni boshqaradi.

Kuchli o‘nlikdan mos ravishda Jeff Bezos (AQSH), Larri Ellison (AQSH), Uorren Baffet (AQSH), Bill Geyts (AQSH), Maykl Blumberg (AQSH), Karlos Slim (Meksika), Mukesh Ambani (Hindiston) va Stiv Balmer (AQSH) kabi milliarderlar o‘rin olgan. 

Umuman olganda, dunyo bo‘yicha milliarderlar soniga ko‘ra AQSH hamon yetakchilik qilmoqda. Mamlakatda 735 nafar milliarder 4,5 trillion dollar boylikka egalik qilmoqda. 562 nafar xitoylik milliarderning esa 2 trillion dollar mablag‘i bor.  Hindiston 169 nafar milliarder bilan ro‘yxatning uchinchi pog‘onasini band qilib turibdi. Ularning jami boyligi 675 milliard dollarga baholangan.

Eslatib o‘tamiz, shu yilning fevral oyida “Bloomberg” nashri Alisher Usmonovning boyligi 2023 yilning boshidan beri 1,06 milliard dollarga ko‘payganini ma’lum qilgan edi.

Nodirjon Madaminov