Alisher Sultonov Bosh vazirning maslahatchisi bo‘ldi

O‘zbekiston Respublikasi Vazirlar Mahkamasi qarori bilan Alisher Saidabbosovich Sultonovga Bosh vazirning Yoqilg‘i-energetika sohasi va sanoatning bazaviy tarmoqlarini rivojlantirish masalalari bo‘yicha maslahatchisi vazifasini bajarish ham yuklandi. Bu haqda Adliya vazirligining “Huquqiy axborot” kanalida xabar berildi. 

Alisher Sultonov joriy yilning 1 fevral kuni O‘zbekiston Respublikasi Prezidenti Shavkat Mirziyoyev tomonidan imzolangan farmonga binoan Energetika vaziri lavozimida faoliyat yuritib kelmoqda. 

U bungacha O‘zbekiston Respublikasi Bosh vaziri o‘rinbosari – Geologiya, yoqilg‘i-energetika kompleksi, kimyo, neft-kimyo va metallurgiya sanoati masalalari kompleksi rahbari lavozimida faoliyat yuritgan. 

Sultonov 2018 yilning 12 sentyabriga qadar  “O‘zbekneftgaz” AJ boshqaruv raisi, 2018 yilning 26 dekabriga qadar O‘zbekiston Milliy olimpiya qo‘mitasi vitse-prezidenti lavozimlarida ham ishlagan.